Биыл теміржол бойында 479 ескерту белгісі ауыстырылды
«Қазақстан теміржолшысы» газетінің тілшісі
Теміржол қауіпті аймақ екенін еске сала отырып, магистраль бойында өндірістік емес жарақаттануды болдырмау және алдын алу мақсатында теміржолшылар ел тұрғындарымен профилактикалық кездесулерді өткізуді дәстүрге айналдырған.
Мәселен, өткен 8 айда 100 мыңға жуық адамды қамтыған жүздеген жиындар мен рейдтер өткен. Теміржолшылар жолға жақын орналасқан оқу орындарына барып, балалармен қауіпсіздік сабақтарын өткізіп, теміржолда жүріс-тұрыс ережелерін қамтитын көрнекі жадынамалар, буклеттер таратқан. Сондай-ақ теміржол инфрақұрылымы объектілерінде қауіпсіздік тақырыбында бейнероликтер көрсетілген.
Мамандардың айтуынша, құқық қорғау органдары қызметкерлерімен бірлесіп теміржолшылар 2,2 мыңнан астам бірлескен рейд ұйымдастырған. Құқық бұзушылармен түсіндірме жұмыстары жүргізіліп, қауіпсіздік жадынамалары таратылған. Сонымен қатар көлік прокуратурасы мен полицияның, ҚР Көлік министрлігінің аумақтық көліктік бақылау органдарының, БАҚ өкілдерін, сондай-ақ жүк тасымалдау бөлімшелерінің шекараларында қатысы бар қызметтерді шақыра отырып, Үйлестіру кеңесінің 145-отырысы өткізілген.
Өндірістік емес жарақаттанудың негізгі себебі адамдардың бастарын қатерге тігіп жолға шығуы болып отыр. Локомотив бригадаларының адамдарды басуын болдырмау үшін шұғыл тежеудің 444 жағдайы қолданылып, соның басым бөлігі Алматы, Шымкент және Маңғыстау өңірлеріне тиесілі болған.
Адамдардың теміржол арқылы жаппай өтетін жерлерінде «Назар аударыңыз, темір жол – қауіптілігі жоғары аймақ», «Өтуге тыйым салынады», «Абайлаңыз, қауіпті аймақ», «Абайлаңыз, электр кернеуі» сынды 479 ескерту белгісі ауыстырылған.