Теміржолды белгіленбеген жерлерден кесіп өткен 39 мыңнан астам азамат жауапкершілікке тартылды
Өскемен-1 станциясында жүк пойызының машинисі 40 жастағы қала тұрғынынын жанай қағып кетті. Ол түрлі жарақаттармен Өскемен қалалық ауруханасына жеткізілді. Бұл туралы Көліктегі ПД бастығының міндетін атқарушы Мадияр Айтуғанов айтты, деп хабарлайды Rail-news.kz.
Оның айтуынша, әйел адам темір жолдарды белгіленбеген жерден кесіп өткен. Қазір аталған факті бойынша сотқа дейінгі тергеу жүргізілуде.
М. Айтуғанов жазатайым оқиғалардың теміржол рельстерін жаяу жүргіншілер жолы ретінде пайдаланған кезде жиі болатынын және оған қатаң тыйым салынатындығын айтты. Сондықтан теміржол бойында болған кезде әрбір адам мейілінше қырағылық танытуы керек.
Көліктегі ПД мәліметіне сүйенсек, ағымдағы жылдың басынан бері көлік полицейлері «Темір жол – аса қауіпті аймақ!» тақырыбында жолаушылар пойыздарында 3780 кездесу, оқу орындарында 2166 дәріс, сондай-ақ 2389 халықпен кездесу өткізген. Сонымен қатар, белгіленбеген жерлерден темір жолдарды кесіп өткен 39051 адам әкімшілік жауапкершілікке тартылды.
«Полицейлердің ұдайы жүргізетін профилактикалық жұмыстарына қарамастан, азаматтар тарапынан теміржол қозғалысы қауіпсіздігі ережелерін бұзу фактілерінің орын алуы жалғасуда.
Өткен кезеңде жылжымалы құрамның астына 79 азамат түскен болса, оның жартысынан көбі өліммен аяқталды, соның ішінде 6 факті бойынша балалар зардап шекті», - деп түйіндеді сөзін полиция полковнигі.
Осы орайда, бәрі білуі шарт негізгі ережелерді естеріңізге саламыз: Теміржолға жақындаған кезде құлаққапты шешулеріңіз қажет, өйткені қатты музыканың кесірінен келе жатқан пойыздың дауысын естімей қалуыңыз мүмкін!
Платформаның шетінде тұрмаңыз, сонымен қатар уақытты үнемдеп, жолды қысқартамын деп темір жолды белгіленбеген жерлерден кесіп өтпеңіз, жүріп бара жатқан пойыздың алдынан кесіп өтпеңіз.