Күзгі байқау қорытындыланды
«Қазақстан теміржолшысы» газетінің тілшісі
Теміржол шаруашылықтары алдағы қатал маусымға дайындық шараларын қамтамасыз ететін күзгі комиссиялық байқауды қорытындылап, қыс маусымына сақадай сай қам жасауда. Комиссиялық байқау инфрақұрылымның, жылжымалы құрам мен техниканың алдағы қыста қауіпсіз де үздіксіз жұмыс істеуін сарапқа салып, қанағаттанарлық деп бағалады.
Бүгінгі таңда «ҚТЖ» ҰК» АҚ Магистральдық желі дирекциясы филиалы шаруашылықтарында күзгі байқау кезінде анықталған ескертулерді жою бағытында жұмыс атқаруда. Байқау барысында дирекция бойынша 113 мың кемшілік анықталған. Жалпы, биыл 21 120 км негізгі жол, 2 837 км станциялық, 19 154 бағыттағыш бұрма, 91 байланыс желісі ауданы, 85 электрмен жабдықтау ауданы және 75 тартымдық қосалқы станциясы жағдайлары тексерілген. 3,4 дәрежелі ақауы бар күрделі жөндеу мерзімі өтіп кеткен және қанағаттанарлықсыз баға алған телімдерде пойыздардың қозғалыс қауіпсіздігін сақтауға қауіп төндіретін ақаулықтарды анықтауға және дер кезінде жоюға ерекше көңіл бөлінген. Сонымен қатар қисық телімдердің, түйіспе саңылауларының, рельс бекітпелерінің, бағыттағыш бұрмалардың жағдайлары, сондай-ақ техникалық құжаттамалардың толтырылуы мен технологиялық процестің орындалуы комиссия мүшелерінің назарынан тыс қалмаған.
«Күзгі байқау қорытындысын сарапқа салар болсақ, жергілікті жерлерде ғимараттар мен құрылыстардың жағдайына қатысты мәселелер бойынша жұмыстардың жақсара түскені байқалады. Барлық магистральдық желі бөлімшелері бойынша күзгі байқау қорытындысын назарға ала отырып, инфрақұрылым нысандарын күтіп ұстау нормаларынан ауытқушылықтарды жоюға қатысты іс-шаралар әзірленіп, бекітілді. Қазір Дирекцияның тиісті құрылымдық бөлімшелері белгіленген мерзімге сәйкес кемшіліктердің толық жойылуын бақылауға алып, осы бағытта жұмысты күшейтуде», – дейді Магистральдық желі дирекциясына қарасты Техникалық департаменттің менеджері Гүлнәр Тілеуова.
Қыс – қыр астында. Солтүстік аймақтарда алғашқы қар түсіп, ауа райы күрт суыта бастады. Қыс шанасын жаз сайлап үйренген теміржол шаруашылықтары үшін жауапты да мазасыз маусым басталды.