Жасөспірімдерге теміржолдың қауіп-қатері түсіндірілді
Ақтөбе облысы бойынша меншікті тілші
Жіңішке станциясының қызметкерлері тәртіп сақшыларымен бірге қала мектептерінде кезекті қауіпсіздік сабағын өткізді. Жасөспірімдерге теміржолдың қауіп-қатері мен жолдан өту ережелері түсіндірілді.
Жіңішке жүк станциясы Ақтөбе қаласының іргесіндегі өндіріс орындары тығыз орналасқан жерде тұр. Айналадағы елдімекен тұрғындары теміржолды белгіленбеген жерінен кесіп өте беруді әдетке айналдырған. Әсіресе мектеп оқушыларына қатысты ескерту жиі тіркеледі. Теміржолшылар тәртіп сақшыларымен бірлесе «Ескертпе» буклеттерін таратып, мектептерге барып дәріс өткізуден кенде емес, әйтсе де сабақ теміржолды кез келген тұстан кесіп өту оқиғалары азаймай тұр.
Кезекті кездесу «Темір жол – аса қауіпті аймақ» тақырыбында темір жолға жақын орналасқан №36 мектепте өтті. Жіңішке станциясы басшысының м.а. Әлібек Жұмабаев пен аға лейтенант Амандық Тайманов профилактикалық дәріс жүргізді. Олар өз жұмыстары туралы баяндап, теміржол инфрақұрылымы нысандарында жүріп-тұру ережесін, ол жерде ойнауға, серуендеуге болмайтын нақты мысалдармен баяндады. Теміржолда болған қайғылы оқиғалардың себеп-салдары талданып, оқыс оқиғалардың алдын алу маңыздылығы түсіндірілді.
ҚТЖ теміржол инфрақұрылымы нысандарында қауіпсіздік ережелерін бұлжытпай сақтауға шақырып, ұстаздарға үнемі ескертіп отыру ұсынылды.
Бұдан бөлек теміржолшылар әскерилендірілген күзет және көлік полициясы қызметкерлерімен бірге үнемі теміржолдың рұқсат етілмеген тұсынан өтетіндерге профилактикалық рейдтер өткізіп, темір жолдағы қауіпсіздік ережелері түсіндірілген жадынамалар таратты. Мақсат – қайғылы оқиғалардың қайталанбауы.