Профилактиканың пайдасы зор
"Қазақстан теміржолшысы" газетінің Жамбыл облысындағы меншікті тілшісі
Тараз станциясындағы Желілік полиция бөлімінің қызмет ету аймағында 1 ақпаннан бастап «Браконьер» жедел-профилактикалық іс-шарасы өтуде. Айлық аясында табиғатты қорғау, бұзушылықтарды анықтап, жолын кесу, сондай-ақ экологиялық қылмыстарды ашу көзделген.
Желілік полиция бөлімінің қызмет көрсету аумағы Тараз бен Жаңатас аралығы, Түлкібастан Ақыртөбеге дейінгі 373 шақырымды құрайды.
– Профилактиканың пайдасы зор. Құққыбұзушылық біреуге болсын азаяды. Мысалы, өткен жылы оқу орындарында – 256, халықпен – 185, мекеме жұмысшыларымен 18 кездесу, жалпы есепті мерзімде барлығы 180 рейдтік іс-шара, 15 дөңгелек үстел ұйымдастырылды. 1 245 мәрте жол үстінде жолаушыларға түсіндіру жұмыстары жүргізілді. Нәтижесінде былтыр 3 353 әкімшілік құқықбұзушылықты анықтадық. Оның басым көпшілігін белгіленбеген жерде сауда жасаушылар мен қоғамдық орында ішімдік ішіп, масаң күйде жүргендер жасаған. Жасөспірімдердің заңды өкілдерінсіз үйден тыс жерде жүріп-тұру дерегі де артқан. Тіркелген фактілерді зерделей келе, 809 тұлғаға 12 728 186 теңге көлемінде айыппұл салынды, – дейді Желілік полиция бөлімінің бастығы, полиция полковнигі Олег Родякин.
Азаматтардың қоғамдық тәртіпті, соның ішінде шойын жолдың бойында жүріп-тұру талаптарын сақтамауы салдарынан былтыр машинистер 97 рет шұғыл жағдайда пойызды тоқтатуға мәжбүр болған. Тежегішті жедел басуға себепкер болған 21 тұлғаның дерегі анықталып, ескерту жасалса, 2 адамға айыппұл салынған. Анықталмағаны – 24.
Төрт түлігін теміржол бойына қараусыз жіберген 21 шаруаға ескерту жасалып, тағы 14-іне айыппұл салынып, толықтай өндіріліпті. Қалған 15 фактінің дерегі анықталмаған.
Былтыр пойыздардың әйнегін сындырудың да 14 дерегі тіркелген. Оның екеуі анықталып, Әкімшілік құқықбұзушылық туралы Кодекстің 127-бабы 3-бөлігіне сәйкес әкімшілік хаттама толтырылып, іс сотқа жолданған.