Қатер аяқ астында...

Жамбыл облысы орталығы іргесіндегі Бурыл станциясында қозғалыс қауіпсіздігін сақтау мақсатында тұрғындарға ақпараттық түсіндіру жұмыстары жүргізілді.

Бурыл – екінші санаттағы жүк вагондарын сұрыптау станциясы. Тараз қаласының бұл аумағында жеке тұрғын үйлер темір жолға тым жақын салынған. 2 орта мектеп пен аурухана да жолға жақын орналасқан. Бір сөзбен айтқанда, жаяу жүргіншілер қозғалысы қауырт аймақ. Көп жағдайда бұрыс пен дұрысты ескере бермейтін балалар тұрмақ, ересектердің өзі асығыстықпен шойын жолды рұқсат берілмеген аумақтан кесіп өтіп кетіп жатады.  

Станциядағы жаяу жүргіншілерге арналған өткел алдында «Темір жол – қауіпті аймақ», «Пойыздан абайла!» деген ескерту белгілері қойылған. Ал «Ауыл береке» базарының жанынан кесіп өтетін автокөлік өткелінде бағдаршам бар. Пойыз келе жатқанда бағдаршам шырылдап белгі береді. Ол жерден өтерде көліктер тоқтап, сосын әрі қарай өтуі тиіс.  

– Бурыл станциясында маневрлік жұмыстар жүргізілгенде, дыбыскүшейткіш құрылғы арқылы хабарлап отырамыз. Бірақ соның өзін ескермейтіндер бар. Әсіресе, оқушылардың көктемгі, жазғы демалысы кезінде пойыздар қозғалысы кезінде қауіп-қатер арта түседі. Жас жеткіншектер қызық көріп, селфи жасап, тик-токқа видео түсіреміз деп ескертулерге қарамастан, вагондардың үстіне шығып кетіп жатады. Тіпті ересек тұрғындардың өзі жақын маңдағы жаяу жүргіншілердің өткелінен айналып жүргісі келмей, станциядағы қызметтік өткелді кесіп өтеді. Жолдың жабық екеніне, пойыздар тоқтап тұрғанына қарамайды. Сондықтан біз Тараз станциясындағы желілік полиция бөлімі бірлесіп, жиі-жиі осылай ақпараттық түсіндіру жұмыстарын жүргізіп отырамыз. Бүгінгі іс-шара станциядағы қызметтік өткелден басталып, №50 орта мектепте жалғасын тапты. Оқушыларға да қауіпсіздік талаптарын таныстырдық, – дейді Бурыл станциясының бастығы Нұрлан Сәкенұлы.  

Станция бастығының айтуынша, жолдан өту ережесін бұзғандарға алдымен ауызша ескерту жасалып, оны да елең қылмағандарға айыппұл салынған. Айыппұл арқалағандар бұл ең бірінші кезекте өз қауіпсіздіктері үшін жасалып жатқанын ескермей, шу көтеріп, реніш білдіреді екен. Мамандар тұрғындарға асығыстықпен қауіпті аймақтың қатерін естен шығармауды ескертеді.