Қызылордада қауіпсіздік курсы өтіп жатыр

Ақпан айының 17-28 аралығында Қызылорда бөлімшесінде «Еңбек қауіпсіздігі мәдениеті» тақырыбында біліктілікті арттыру курсы өтуде. Аймақтың солтүстігіндегі Сексеуіл, Қазалы, Жосалы станцияларында басталып, оңтүстікке ойысқан курс мақсаты   теміржолшылардың қауіпсіздік мәдениетін арттыру болмақ.  

 «ҚТЖ» ҰК» АҚ ЦБТ бас менеджері Бибігүл Нәдірбекова, ішкі тренер, ЦБТ менеджер Ақназар Мүтәліпов, Ақтөбе магистральдық желі бөлімшесінің тренері Шеге Зейнекеннің жетекшілігімен өтіп жатқан көшпелі курс тыңдаушылары жергілікті теміржол мекемелерінің жұмысшылары мен қызметкерлері. Курсқа Қызылорда магистральдық желі бөлімшесінің бас инженері Берік Бекжанов, Қызылорда ЖТ бөлімшесінің Қауіпсіздік және еңбек қорғау, экология бөлімінің басшысы Ғалия Көпжасарова, станциялардағы мекеме басшылары мен еңбек қорғау бөлімінің мамандары да қатысып, білімдерін шыңдады.

Тренерлер теміржолшыларға «Қауіпсіздік мәдениеті» бойынша кеңінен түсінік беріп, олардың жұмыс орындарында кездесетін қауіп-қатерлердің алдын алу мен қауіпсіздік ережелерін сақтау жайында дәріс оқыды.Теміржолшыларға жұмыс барысында кездесетін түрлі қауіптер, қауіпсіздік ережелері мен нормалары туралы жан-жақты ақпарат берілді. Теміржолшылардың жұмысы жауапты және қауіпті болғандықтан, олардың құқықтары мен міндеттері егжей-тегжейлі түсіндірілді. Жұмысшылардың жауапкершілігін арттыру мен қауіпсіздік мәдениетін нығайту әсіресе шағын станцияларда, жұмысшы құрамының аздығы жағдайында өте маңызды екені сөз болды.  

Мәселен Қаракеткен, Қараөзек, Жалағаш, Тереңөзек, Бәйгеқұм және Тартоғай сияқты шағын станцияларда толаскез, жол жөндеу жұмыстары кезінде жұмысшылардың жетіспеушілігі байқалатыны, пойыз құрастырушы мен вагон қараушының түнгі ауысымдарда тапшылығы, т.б. жағдайларда қауіпсіздік мәдениетін арттыру қажеттілігі туындайтыны курста талқыға салынды.

Сонымен қатар техникалық қауіпсіздік пен еңбек заңнамаларына қоса, теміржолшылар арасында туындайтын психологиялық қысым мәселелері де талқыланды. Пойыз құрастырушының жұмысына кедергі келтіру, уақытын қысқарту сияқты стресс пен қысымның еңбек қауіпсіздігіне тікелей әсер етуі жайлы арнайы кеңестер берілді. Тренерлер бейнебаян, сызбалы кесте, бейнелі сауал, көрнекілік ақпараттары арқылы қауіпсіздік мәдениетінің сақталуын және өз тәжірибелерінен мысалдар келтіріп, тыңдаушыларға практикалық кеңестер ұсынды.

– Теміржолшылардың арасында туындайтын психологиялық қысым мәселесіне келсек, мысалы пойыз құрастырушының жұмысына белсенді түрде кедергі келтіру, уақытын мазалап асықтыру, еңбек қауіпсіздігіне тікелей әсер ететін факторлар. Теміржолшыларға жұмыс процесінде стресс пен қысыммен қалай жұмыс істеу керектігі туралы практикалық кеңестер берілді. Тренерлер арнайы дайындаған бейнематериалдарында еңбек қауіпсіздігі мәдениетінің сақталуын назарға ұсынып, өздерінің іс-тәжірибелерінен көптеген мысал келтіріп түсіндірді.  Курс осы аптаның соңына дейін Шиелі және Жаңақорған станцияларында жалғасып, аптаның соңғы күні Қызылорда станциясында қорытындыланатын болады, – деді инженер Ғалия Көпжасарова.