Теміржол бойында қараусыз жайылған мал көбейді

Күн жылынып, жер қарая бастағалы теміржол бойында қараусыз жайылған мал көбейді. Бұл жағдай пойыздардың қозғалысы кезінде қауіп-қатерді арттыра түседі. Әсіресе станцияларда маневрлік жұмыстар жүргізіліп жатқанда қиындық туғызады.

Жамбыл магистральдық желі бөлімшесі Түлкібас жол дистанциясының бас инженері Шәмшидин Дадабаевтың айтуынша, қараусыз жүрген малдың шойын жолға шығып кетуінің салдарынан пойыздарды шұғыл тоқтатқан жағдайлар көбейген.  

– Былтыр күз айларында мал басу жағдайлары жиілеп кетті. Айналдырған екі айдың ішінде осындай 3 оқиға тіркелді. Біріншісінде, Шақпақ жолының 3411-шақырымында кешкі сағат сегіздердің шамасында шойын жолға мал шығып кетіп, №1273 жүк пойызы шұғыл тоқтаған. Арада бір жарым ай өтпей жатып, Шақпақ жоларалығының 3408-шақырымына келгенде машинист сағатына 58 шақырым жылдамдықпен келе жатқан Ақтөбе-Алматы бағытындағы №34 жолаушылар пойызының тежегішін жедел басуға мәжбүр болады. Келесі күні Сурум-Күркіресу жоларалығының 3463-шақырымында мал қағып кеткен №1256 жүк пойызы тоқтатылады. Малын қараусыз қалдырудың кесірінен локомотивтер бұзылып, кей кездерде теміржолға да зақым келді. Пойыздарды шұғыл тоқтатқанда, жүк тиелген вагондар болса, қоршаған ортаға тигізер қатері көп. Жолаушылар пойызын кенеттен тоқтатса, қозғалыс кестесі өзгереді. Оған адам факторын тағы қосыңыз. Апат орын алған участокте рельске де зақым келуі мүмкін. Мал иесіне келер шығын тағы бар. Биыл қыс жайлы болды. Күн жылынғалы бері шойын жолдың маңында жайылып жүрген мал қарасы көбейді. Қозғалыс қауіпсіздігінің алдын алу үшін елді мекендерге барып, тұрғындарға түсіндіру жұмыстарын жүргізуді күшейттік, – дейді Шәмшидин Нажимұлы.  

Кейін қараусыз қалған мал иелері табылып, қолданыстағы заңнамаға қатысты оларға әкімшілік айыппұл салынған. Жалпы теміржол маңына төрт түлігін бақылаусыз жібергені үшін мал иелері әкімшілік, азаматтық және қылмыстық жауапкершілікке тартылады. Мұндай жағдайда ескерту немесе бес айлық есептік көрсеткіш мөлшерінде айыппұл төлейді.