Өрт сөндіру пойызы дайындықтарын шыңдады

Әрине, апат айтып келмейді, сондықтан әрдайым сақтық пен дайындық қажет. Таңертеңгі 11.00-де Теңдік станциясының 5-ші жолында тұрған вагоннан өрт шықты. Вагонға тиелген тез тұтанғыш заттар жанып, цистернадан қара түтін будақтай бастады.  

Оқу-жаттығу осылай басталды. Станция кезекшісі қалалық 101 өрт сөндіру қызметі мен Ақжайық өрт сөндіру пойызына шұғыл хабарлады. Пойыз апатты дабылмен тез жинақталып, 13 шақырым жердегі Теңдік станциясына 24 минутта жетті. Келген бойда өртті оқшаулауға тырысып жұмысқа жедел кіріскен өрт сөндірушілер 11.50-де өрт ошағын толықтай жойып, қызыл жалын сөндірілді.  

Атырау жүк тасымалы бөлімшесінің азаматтық қорғаныс және төтенше жағдайлар жөніндегі инженері Нұрлан Сұлтанғалиевтің айтуынша, бұл жылына екі рет болатын жоспарлы өрт сөндіру оқу-жаттығуы. Теңдік станциясында алғаш рет өткізіліп отыр.  

– Теміржол көлігімен тез тұтанғыш заттарды тасымалдау кезінде туындаған төтенше жағдайларды жою тақырыбында шартты түрде өткен бүгінгі оқу-жаттығу ойынына қалалық деңгейдегі өртке қарсы қызмет және ең алдымен өзіміздің Ақжайық өрт сөндіру пойызы, әскерилендірілген теміржол күзеті, НЖС, НОД, ШЧ, ЭЧ, ДС мамандары қатысты. Барлығы 35 адам, 1 пойыз және 2 техника осы шараға жұмылдырылып отыр. Бұл жеке құрам мен өртке қатысы бар құрылымдық мекемелердің төтенше жағдайға дайындығын тексеру әрі шыңдау үшін, апатты жағдайда шұғыл шешім қабылдауға үйрену үшін қажетті шара, – дейді ол.  

«Осы шараға арнап станцияның жүк тиейтін бөлігіндегі бесінші жол бөлініп, оқу-жаттығу ойынының ойдағыдай өтуіне барлық жағдай жасалды. Және өзіміз оның куәсі бола отырып, алда-жалда апатты жағдай орын алғанда өрттің тез сөндірілетініне көз жеткіздік. «Күш – бірлікте» демекші, өрт сөндіруге жұмыла кіріскен барлық құрылымдардың дайындығы жақсы екені білінді», – дейді станция бастығының орынбасары Ізбасар Өткелбаев.