Қызылорда өрт сөндіру пойызы кәсіби дайындықтарын шыңдады
Қызылорда облысы бойынша меншікті тілші
Қызылорда станциясында жүк вагонындағы имитациялық өртті сөндіру бойынша өрт-тактикалық оқу-жаттығу өткізілді. Облыстық төтенше жағдайлар департаменті мен Қызылорда өрт сөндіру пойызының бірлесуімен өткен жаттығу жоспарға сай ұйымдастырылды.
Жаттығу «Жүк вагонындағы имитацияланған өртті сөндіру» тақырыбында өтті. Қызылорда өңіріндегі салалық мекемелердің басшылары жаттығу барысын бақылап, алдағы уақытта не нәрсеге басты назар аудару керектігі жайлы сараптама жасады.
Оқу-жаттығу сценарийі бойынша сағат 09:59-да станция кезекшісі жүк вагонынан шыққан түтінді байқап, дереу құзырлы органдарға хабарлайды. Бұл ақпарат негізінде сағат 10:00-де диспетчерлік нұсқау қызметінің бастығы А.Жанаев бұйрық беріп, Қызылорда өрт сөндіру пойызы жедел дайындық әрекетіне көшті.
Өрт сөндіру пойызы 800 метр қашықтықтағы жаттығу орнына жедел жетіп, сағат 10:02-де барлау жұмыстарын бастады. 10:03-те дайындық аяқталып, 10:04-те өртті сөндіру іс-қимылдары жүргізіле бастады. Өрт 10:15-те локализацияланып, 10:22-де толығымен сөндірілді.
Өрт сөндіру пойызының бастығы Рысбек Шадаевтың айтуынша, оқу-жаттығу жоғары деңгейде ұйымдастырылып, барлық құрылымдардың үйлесімді өзара іс-қимылы қамтамасыз етілді.
– Теміржолдағы төтенше жағдайлар кезінде ең алдымен кәсіби дағды бойынша әрекет етесің. Осындай оқу-жаттығу сол кәсіби дағдыны жетілдіріп, тәжірибелік шеберлікті шыңдайды. Сондықтан жаттығу демей, барынша шынайы жағдайда қарастырамыз, – деді ол.
Өрт сөндіру кезінде қызметкерлердің барлығы өз міндетін талапқа сай, жауапкершілікпен орындай білді. Өрт сөндіруші Сұлтан Нышанбай, бөлім басшысы Ғани Төлегенов, ГДЗС шебері Қайрат Бердімұратов, өрт сөндіруші сарбаз Досым Әбілқасымовтың кәсіби шеберлігі мен батылдығы үшін басшылық тарапынан алғыс жарияланды.
Сағат 10:33-те оқу-жаттығу толық аяқталып, сағат 11:33-те қорытындысы шығарылды. «Жүк вагонындағы имитацияланған өртті сөндіру» тақырыбындағы өрт-тактикалық оқу-жаттығу жоғары деңгейде өтіп, кәсіби дайындық жоғары баға алғаны айтылды.
Кез келген уақытта болуы мүмкін өртті сөндіру тактикалық оқу-жаттығуына қызылордалық теміржолшылар, төтенше жағдайлар департаменті, ӘТЖК, Қызылорда локомотив пайдалану депосы мен электрмен жабдықтау мекемелері, жедел жәрдем және басқа құрылымдардан 72 адам мен Өрт сөндіру пойызы, 6 ТЖБ, 4 АС-40, 1 Газель және 1 жедел жәрдем техникасынан жасақталған арнайы 7 бірлік техника қолданылған.
Бұл оқу-жаттығу – теміржол инфрақұрылымындағы қауіпсіздікті қамтамасыз ету, төтенше жағдайларға шұғыл әрекет ету және сала мамандарының кәсіби дағдыларын жетілдіру мақсатында өткізілген маңызды іс-шара. Мұндай дайындықтар нақты қауіп-қатер туындаған жағдайда адам шығынын болдырмауға және материалдық шығынды азайтуға мүмкіндік береді.
