Жасөспірімдерге темір жолдың қауіптілігі түсіндірілді
Маңғыстау облысы бойынша меншікті тілші
Жақында ғана бір топ жасөспірімнің пойызға жармасып мініп отырған видеосы тарап, біраз шу болған. Осындай әрекеттердің алдын алу бағытында 10 сәуірден 6 мамырға дейін «Жасөспірім» жедел профилактикалық іс-шарасы өтіп жатыр.
Түбектегі желілік полиция өкілдері де аталған шараның өз деңгейінде өтуіне ұйытқы болуда. Олар Маңғыстаудағы теміржол аумағында балалардың заңды өкілдерінсіз жүруінің, өз өмірлеріне қауіп төндіретін әрекет істеуінің алдын алу жұмыстарын қолға алған. Желілік полиция бөлімі Әкімшілік полиция бөлімшесінің қызметкерлері № 2 мектеп оқушыларына профилактикалық жұмыстар жүргізді. Оқушылармен кездесуде олардың суық қару ұстамауы (кастет, пышақ, электрошокер, т.б заңға қайшы заттар) және түнгі уақытта ата-анасыз үй-жайдан тыс жерлерде жүрмеуі, басқа да әкімшілік, қылмыстық құқық бұзушылықтар туралы түсінік берді.
– Мұндағы басты мақсат – жасөспірімдер арасындағы қылмыстың алдын алу және ескерту, соның ішінде білім беру ұйымдарының оқушылары арасындағы құқық бұзушылықтардың жолын кесу, кәмелетке толмағандардың құқықтарын қорғау саласындағы әкімшілік және қылмыстық құқық бұзушылықтарды анықтау, қоғамдық орындарда және пойыздардағы бұзақылықтың, сондай-ақ балаларға қатысты қылмыстық қол сұғушылықтың алдын алу. Заң бойынша кәмелетке толмаған жасөспірімдерге түнгі сағат 22:00-ден кейін компьютерлік клубтарда, ойын-сауық орындарында болуға және 23:00-ден кейін көшеде ата-анасыз жүруге тыйым салынады. Ата-аналарға бейсауыт уақытта балаларды қадағалаусыз қалдырмауды сұраймыз, – дейді Маңғыстау станциясындағы ЖПБ ӘПб инспекторы Әсем Тойлыбаева.
Мұндай профилактикалық іс-шара Сай-Өтес станциясында да өтті. Станциядағы ЖПб басшысы Н.Рахметовтің хабарлауынша жергілікті полицейлер жолаушылар пойыздарында, вокзал және теміржолға жақын орналасқан аулалар мен көшелерде күшейтілген рейдтер жүргізуде.