Дүниежүзілік еңбек қорғау күні аясында Жіңішке станциясында арнайы тренинг өтті

Теміржол мекемелерінде еңбекті қорғау, қауіпсіздікті қамтамасыз ету мақсатында семинар-тренингтер жиі ұйымдастырылады. Жіңішке станциясында өрт қауіпсіздігіне қарсы арнайы тренинг өтіп, теміржолшылар өрт сөндіру құралдарын іс жүзінде қолданып көрді.

Жіңішке станциясында өткен өрт қауіпсіздігі тренингіне мемлекеттік емес өртке қарсы қызметінің инспекторы Ақылбек Аманқұлов шақырылып, арнайы дәріс оқыды. Теміржолшыларға арналған тренинг теориялық негізбен басталып, практикалық сабақпен жалғасты. Өрт қауіпсіздігі, оған қойылатын талаптар, техникалық негізді сақтау туралы қарапайым ережелер түсіндірілді, пысықталды.  

«Теміржол мекемесінің өз өрт сөндіру қызметі бар. Десек те, қауіпсіздік шарттарының алғашқы әрекеттерін әр қызметкер, әр теміржолшы білуі тиіс. Өрт сөндіру құралдарының түрлері, оларды қолдану, өрт болған кездегі алғашқы әрекеттер мен қарапайым ережелерді білгеннің еш артығы жоқ, өндірісте түрлі жағдай орын алуы әбден мүмкін», – деді Ақтөбе мемлекеттік емес өртке қарсы қызметінің инспекторы Ақылбек Аманқұлов.  

Теміржолшылар тренингте өрт болған кезде әрекет ету тәртібін үйренді. Өрт сөндіру құралдарын қолданып көріп, оларды пайдалану ережесімен танысты.  

«Тренинг кезінде сұрақ-жауап көп болды. Диалог енгізу арқылы ережелерді ұғыну қарапайым тілде болды. Бұл Дүниежүзілік еңбек қорғау күні қарсаңында өткен маңызды шара болды», – деді Жіңішке станциясының еңбекті қорғау және қауіпсіздік инженері Айнұр Әбілберікова.