Теміржолшылар техникалық сабаққа қатысты

Ақтөбе және Батыс Қазақстан бөлімшелерінің теміржолшылары «Мәдениет пен еңбек қауіпсіздігі» тақырыбындағы техникалық сабаққа қатысты. Өндірістік жарақаттану деңгейін төмендету және қауіпсіздік мәдениетін арттыру мақсатындағы іс-шара жаңаша форматта өтті.

Техникалық сабаққа бұрын жұмыс орнында жазатайым оқиғадан зардап шеккен, өндірістік жарақат алған жұмысшылар да қатысты. Олардың қатарында Зинекен Шеге, Муталипов Ақназар бар. Олар өздерінің өмірлік тәжірибелерімен бөлісті. Өздерінің қатысуымен болған қайғылы оқиғаларды баяндады. Қауіпсіздік ережелерін сақтамаудың нақты салдарын көрсетті. Кішкентай қателіктің өмірін түбегейлі өзгерткенін айтып берді. Олардың сөздері қатысушыларға үлкен ой салды.  

«Басты мақсат – нөлдік жарақат алу деңгейіне жету. Сол үшін алдымызға міндет қойылды. Теміржолшылардың қауіпсіздік мәдениеті деңгейін көтеру маңызды сұрақ. Қауіпсіздіктің іс-қимыл диалогы әрбір қызметкердің қауіпті еңбек жағдайын анықтап, оны платформада тіркеуіне құқық береді», – деді Ақтөбе ЖТ бөлімшесінің жетекші инженері Бақытнұр Ермекова.  

Курс барысында тәжірибелік жағдайлар мысалға келтірілді. Алгоритмдер арқылы қауіпсіз жұмыс істеу тәсілдері көрсетілді. Қатысушылар мұндай сабақтар еңбек қауіпсіздігіне деген көзқарасты түбегейлі өзгертудің бастамасы екенін атап өтті.