Никельтау станциясында далалық өртке қарсы тактикалық оқу-жаттығу өтті
Ақтөбе облысы бойынша меншікті тілші
Ақтөбенің Никельтау станциясында далалық өртпен күрес шараларын пысықтаған тактикалық оқу-жаттығу өтті.
Өңірдегі төтенше жағдайлар департаментінің техникасы мен жеке құрамы қатысқан кешенді шарада дала өрттерін сөндіру, теміржолға жақындатпау, алдын алу шаралары көрсетілді.
«Оқу-жаттығудың басты мақсаты барлық қатысушылардың ықтимал қауіпсіздік қатерлеріне жедел ден қоюға дайындығын тексеру, сондай-ақ нақты қауіп төнген кезде жедел қызметтер мен ҚТЖ персоналы арасындағы іс-қимылдарды үйлестіруді жетілдіру болып табылады. Кешенді шара ауқымды өтті. Бірнеше станция өкілдері, ауыл құтқарушылары жұмылдырылды. Мұндай шаралар қауіп кезінде сауатты әрекет етуді нақтылап береді. Шара Хромтау ауданы ТЖ бөлімінің ұйымдастыруымен өтті», – деді Ақтөбе мемлекеттік емес өртке қарсы қызметінің басшысы Әділ Құбаев.
Жаттығуға Қандыағаш өрт сөндіру пойызынан 12 адам, Ақтөбе мемлекеттік емес өртке қарсы қызметінің басшылық құрамы және Хромтау, Қарғалы аудандарының Төтенше жағдай бөлімдері қатысты. Сонымен қатар станциядағы вагон депосы, жол дистанциясы, байланыс дистанциясы қызметкерлері де қалыс қалған жоқ.