Жолаушылар вагонынан өрт шыққанда...
Ақтөбе облысы бойынша меншікті тілші
«ҚТЖ» ҰК» АҚ Ақтөбе магистральдық желі бөлімшесі филиалына қарасты Ақтөбе өрт сөндіру пойызы кезекті оқу-жаттығу шарасын өткізді. Өрт сөндіру жоспары азаматтық қорғаныс қызметкерлерімен бірлесіп ұйымдастырылды.
Сценарий бойынша жолаушылар пойызында дабыл қоңырауы соғылды. Вагонның электр қалқанындағы тоқ қысқа тұйықталып, өртке ұласқан. Жолаушылар вагонын иіс, түтін алып кетті. Құтқарушылар әп-сәтте вагонды салқындатып, өрттің ұлғайып кетпеуін қадағалады. Екі звено көбіктендіргіш қолданып, жалынның күшін басты.
Оқу-жаттығу Ақтөбе өрт сөндіру пойызы бастығы Бауыржан Файзуллаұлының жетекшілігімен өтті. Жеке құрамнан 15 адам қатысты. Тактикалық тәртіптен ауытқымай, қауіп кезінде орындалуға тиіс маңызды әрекеттер көрсетілді. Өрт сөндіруші Асұлан Құдайбергенов пен көлік жүргізуші Мейрамбек Есенғұлов және ГТҚҚ шебері өрт шыққан вагоннан кеміртегі тотығына уланған адамды дереу носилкамен алып шығып, медициналық қызметкерлердің қолына тапсырды. Ал өрт сөндірушілер Айдос Сисенғалиев пен Мақсат Нұрмағамбетов айналадағы ғимараттарға өрт ұлғайып кетпеуі үшін лезде су бүрку арқылы жалын күшін басты.
Сонымен қатар өрт жеңдерін жөндеу шебері Анарбеков пен өрт сөндіруші Асылхан Ешмағамбетов көбіктендіргіш беру арқылы жолаушылар вагонын толықтай залалсыздандырды. Апаттық оқиға болған жерде қауіп толықтай жойылды. Осылайша, берілген тапсырма уақытында орындалып, оқу-жаттығу іс-қимылын жедел әрі сауатты, шапшаң орындаған құтқарушылар әрекеті жоғары баға алды.
«Нағыз апаттық жағдай шынайы көрсетілді. Әрекеттер де соған сай болды. Өрт туралы хабарландырған сәттен бастап әр әрекет сауатты атқарылып, қауіпті аймақтан эвакуациялау, қауіптің алдын алу кезіндегі қозғалысқа мән берілді. Тактикалық жаттығудың негізгі мақсаты да осы. Жалпы кез келген адам төтенше жағдай кезіндегі ереже-талаптарды білуі тиіс», – деді Ақтөбе өрт сендіру пойызы бастығы Бауыржан Файзуллаұлы.
Мұндай оқу-жаттығулар қызметтердің ықтимал төтенше жағдайларға жедел ден қоюға дайындық деңгейін арттыру, азаматтардың қауіпсіздігін қамтамасыз ету және ТЖ салдарын азайту үшін тұрақты өткізіліп тұрады.
