Апат айтып келмейді

Иә, апат айтып келмейді.  Сондықтан барлық өрт сөндіру және құтқару қызметтеріне әрдайым сақтық пен дайындық өте қажет. Осы мақсатта Атырау станциясында жоспарлы оқу-жаттығу өтті.  

Таңертеңгі 10.00-де Атырау станциясына таяу Отын ресурстары орталығының Атырау филиалына қарасты қоймасында мұнай резервуарын дәнекерлеу жұмыстарын жүргізу кезінде қауіпсіздік техникасы және еңбек қорғау талаптары сақталмай, өрт пайда болады. Жақын орналасқан резервуарларға көшу қаупі туындап және жұмысшылар өміріне де қауіп төндіреді.  

Ашық отты байқаған жұмысшылар дереу Атырау станциясының кезекшісіне хабарлайды. Ол өз кезегінде қалалық өрт сөндіру қызметі 101 нөміріне, «ҚТЖ» ҰК» АҚ мемлекеттік емес өртке қарсы қызметі, Атырау орталықтандырылған өрттік байланыс пунктінің диспетчеріне және Ақжайық өрт сөндіру пойызына, сонымен қатар аймақтық пойыздарды басқару орталығы «РЦУП-Ақтөбе» кезекшісіне хабарлайды. Барлық қызметтер шұғыл әрекет етіп, алдымен Атырау электрмен қамту дистанциясы «Отын ресурстары орталығында» электр жүйесін тоқтан ажыратады. Ал Ақжайық сигнализация және байланыс дистанциясы ол жерде байланыс торабын ұйымдастырады. 

Оқиға орнына шұғыл жеткен Атырау әскерилендірілген теміржол күзеті қызметкерлері оқиға болған жерді оқшаулап, бөгде адамдардың өртке жақындауына жол бермейді және жұмысшыларды қауіпсіз жерге шығарады. Ақжайық өрт сөндіру пойызы өрт ошағы орын алған жерге 20 минутта жетіп, су және көбік шашу оқпандарымен өртті сөндіруге кіріседі. 10.55-те өрт ошағы басылып, 11.15-те Ақжайық өрт сөндіру пойызы мен Атырау ТЖД №1 ӨСБ қызметімен бірлесе өрт толықтай өшіріледі.  Атырау жүк тасымалы бөлімшесінің азаматтық қорғаныс және төтенше жағдайлар жөніндегі инженері Нұрлан Сұлтанғалиевтің айтуынша, бұл – жылына екі рет болатын жоспарлы өрт сөндіру оқу-жаттығуы. «Отын ресурстары орталығында» алғаш рет өткізіліп отыр.  

– Атырау магистральдық желі бөлімшесі бастығының «Атырау станциясындағы отын қоймасында сыйымдылығы 3000м/куб резервуарлардағы өртті сөндіру және өрт зардаптарын жою бойынша практикалық шараларды жүргізуді ұйымдастыру» бұйрығына сәйкес бүгінгі өрт-тактикалық оқу-жаттығу өтті.  Бұл жеке құрам мен өртке қатысы бар құрылымдық мекемелердің төтенше жағдайға дайындығын тексеру әрі шыңдау үшін, апатты жағдайда шұғыл шешім қабылдауға үйрену үшін қажетті іс, – дейді ол.  

Өрт сөндіру бойынша оқу-жаттығуға әртүрлі құрылымдардан барлығы 57 адам, 1 пойыз және 5 техника жұмылдырылып, 10 тонна су, 40 литр бензин жұмсалған. Атырау станциясының басшылығы оқу-жаттығудың тәртібіне сай азаматтық қорғаныс құрылымдарын жеке қорғану құралдарымен қамтамасыз етсе, ҚР ТЖД «Азаматтар медициналық орталығы» қызметкерлері және азаматтық қорғаныс құрылымының санитарлық пост қызметкерлері шартты түрде зардап шеккен жұмысшыларға медициналық көмек көрсетті.