Ұрлық түбі – қорлық

Тараз станциясындағы желілік полиция бөлімінің қызметкерлері теміржол бойындағы қауіпсіздікті қамтамасыз етумен қатар, қылмыстық істер бойынша кең ауқымда жедел-іздестіру іс-шараларын жүргізеді. Дер кезінде анықталған шаралардың нәтижесінде қылмысқа барғандар тиісті жазасын алып жатады. Соның бірі – желілік полиция жолын кескен ұрлық фактісі.

Тараз станциясындағы желілік полиция бөлімінің бастығы Олег Родякиннің айтуынша, оқиға өткен жылы болған. Бөлімшеге қала көшелерінің бірінде темір жолдың құрылыс материалы тиелген «БМВ» маркалы екі машина кетіп бара жатқаны туралы хабарланады. Полиция қызметкерлері дереу көліктердің ізіне түседі. Мұны байқаған күдіктілер жылдамдықты арттырып, қашып кетуге тырысады. Ақыры соңында көліктерін тастап, өздері іздерін суытқан.  

Көлікті қолға түсірген соң желілік полиция қызметкерлері кең ауқымда жедел-іздестіру іс-шарасын жүргізіп, осы қылмысқа қатысы бар тұлғалардың барлығының ұрлық әрекетін дәлелдеп, материалды сотқа жолдаған.  

– ПЧ-51 Жамбыл жол дистанциясының күдікті Н. есімді жұмысшысы 21 маусымға қараған түні Тараз қаласы, М.Тынышпаев көшесінің бойында орналасқан дистанцияның аспалы құлыппен жабылатын теміржол бұйымдарын сақтауға арналған өндірістік учаскесінің №1 табель қоймасы арнайы күзетілмейтінін, сол күні тек әріптесі А. есімді азамат осы қойманы сырттай бақылап жүретінін анықтап, оңай жолмен пайда табу мақсатында қоймадан теміржол бұйымдарын ұрлауға жоспар құрған. Осы мақсатта ұялы телефоны арқылы танысы Ж. есімді азаматқа хабарласып, жоспарымен бөліскен. Ж. оның ұсынысын қолдаған.  

Осылайша 20.06.2024 жылы сағат 23.00 шамасында Ж. өзінің екі інісіне және Н. есімді туысына хабарласып, қоймаға шақырады. Інілерінің бәрі бұрын сотты болған. А. және Н. есімді інілері «БМВ» маркалы автокөліктерімен келген. Н. есімді теміржолшы және оның Ж. есімді сыбайласы екеуі аталған қойманың жанындағы темір баспалдақпен көтеріліп, шатырды тартып жылжытып, қойманың үстін ашып, қойма ішіндегі тесіктен сыртта оларды күтіп тұрғандарға стрелка бағыт табандығы, бұрма табандығы сияқты теміржол бөлшектерін лақтырған. Қақпаның сыртындағылар оларды көлікке тиеген, – дейді Тараз станциясындағы желілік полиция бөлімінің бастығы О.Родякин.  

Ұрылар ПЧ-51 өндірістік учаскесінің №1 табель қоймасының шатырын тартып жылжыту арқылы ашып, қойманың ішіне заңсыз кіріп, 42 493 теңгеге материалдық зиян келтірген.  

Желілік полиция қызметкерлерінің жедел іздестіру іс-шараларының нәтижесінде қылмыс толығымен дәлелденіп, Н. және ағайынды Ж., А. есімді азаматтар Қазақстан Республикасының Қылмыстық Кодексінің 188-бабының 3-бөлігі 3-тармағымен кінәлі деп танылып, олардың әрқайсысына мүлкін тәркілеусіз 3 жыл мерзімнен бас бостандықтарынан шектеу жазасы тағайындалды.  

Сондай-ақ ағайынды А. және Н. есімді азаматтар Қазақстан Республикасының ҚК-нің 188-бабының 3-бөлігі 3-тармағымен кінәлі деп танылып, олардың әрқайсысына мүлкін тәркілеусіз 2 жыл 6 ай мерзімнен бас бостандықтарынан шектеу жазасы тағайындалған.