Жіңішке станциясында кезекті рейд өтті
Ақтөбе облысы бойынша меншікті тілші
Жіңішке станциясы қызметкерлері мен желілік полиция қызметкерлерінен құралған топ тағы да рейдке шықты. Себебі жаяу жүргіншілер мен иесіз малдан темір жолға келетін қауіптің алдын алу теміржолшылар үшін өзекті мәселеге айналғалы қашан.
Ақтөбе қаласының ішінде орналасқан Жіңішке станциясы – бірінші класты. Бұл жерде АҚШ, Жапония, Оңтүстік Корея, Франция, Германия, Қытай, Ресей елдеріне ірі көлемде жүк жөнелтіледі. Станцияның орналасқан жері де жүк жөнелтуге қолайлы. Айналасына ірі зауыттар мен өндіріс ошақтары шоғырланған. Сонымен қатар станцияның екі жағында елдімекен, әлеуметтік нысандар бар. Сондықтан жүк тиеу-түсіру жұмыстары қарқынды жүріп жатқан станцияда қауіпсіздік аса маңызды. Бұл жерде рейд, түсіндіру жұмыстары жиі өтетіні де сондықтан.
Бүгін де Жіңішке станциясы басшысының орынбасары Әлібек Жұмабаев пен инженер Әсемгүл Сәуірбаева және желілік полиция бөлімінің аға инспекторы өткел бойын барлап, мөлтек аудан тұрғындарына, мектеп оқушыларына жолдан өту ережесін түсіндіріп, жазатайым оқиғалардан сақтандырды. Ата-аналарға балаларға абай болып, қараусыз жібермеу, әсіресе түнгі мезгілде жалғыз-жарым жүрмеуін қадағалау ескертілді.
«Биыл 25 тұрғынға ескерту берілді. Олар – қауіпсіздікке мән бермей, белгіленбеген жерді кесіп өткендер. Шараның барлығы құқық қорғау қызметкерлерімен бірлесіп атқарылды. Қауіпсіздік шараларын бұзған жағдайда ҚР ӘҚБтК-нің 559-бабының 5-тармағына сәйкес әкімшілік хаттама толтырылып, жауапқа тартылатындығы түсіндіріліп, үнпарақ таратылды», – деді Жіңішке станциясы басшысының орынбасары Әлібек Жұмабаев.
Тәулігіне 22 пойыз өтетін жүк станциясында 67 кірме жол бар. Оның бәрі жұмыс істейді.