Қауіпсіздік ережелерін сақтау қатаң тексерілуде

Оқушылардың жазғы демалысы аяқталып, жаңа оқу жылы басталғалы отыр. Осыған орай «Қазақстан темір жолы» ұлттық компаниясы теміржол инфрақұрылымы маңында балалардың қауіпсіздігін қамтамасыз етуге ерекше көңіл бөлуде.

– Темір жол – қауіптілігі жоғары аймақ. Оқу жылының басталуымен оқушылар үйреншікті бағдарына қайта оралатыны мәлім. Міне, осы кезеңде жазатайым оқиғалар қаупінің арта түсетін әдеті. Осыған байланысты ҚТЖ компаниясы әдеттегідей алдын алу шараларын күшейтіп, бүкіл ел бойынша түсіндіру акцияларын іске қосып отыр, – дейді Қозғалыс қауіпсіздігі департаментінің директоры Марат Шакенов.  

Сонымен «Қазақстан темір жолы» ҰК» АҚ тарапынан оқу жасындағы балалардың темір жолдан өту барысында жүріс-тұрыс қауіпсіздігін сақтау үшін қандай шаралар қабылданып, іске асырылып жатыр?  

Ең алдымен адамдардың теміржол жолдарына шығу қаупі жоғары учаскелерде пойыздардың қозғалыс жылдамдығы төмендетіледі. Екіншіден, теміржол бойына қоршау салу бойынша жоспарлы жұмыстар жүргізіліп жатса, келесі кезекте жаяу жүргіншілер көпірлерін салу бойынша жергілікті атқарушы органдарға техникалық шарттар берілген. Оқу басталысымен теміржолшылар мектептерде ақпараттық кездесулер өткізіп, онда балаларға теміржолдағы тәртіп ережелері туралы айтып түсіндірмек. Сонымен қатар жаяу жүргіншілер өткелдері мен елді мекендердің жанында қосымша ескерту белгілері орнатылуда. Теміржолшылар қауіпсіздікті күшейту мақсатында құқық қорғау органдары өкілдерімен және жергілікті әкімдіктермен бірлесіп жұмыс істеп, қозғалысы жоғары учаскелерде бақылауды күшейтіп отырғанын атап өткен жөн. Сондай-ақ қауіпті аймақ саналатын теміржол бойында болмауды, жол үстінде жүрмеуді еске салатын жадынамалар, баннерлер және бейнематериалдар таратылуда.  

«Негізгі міндет – балалар мен олардың ата-аналарына теміржол ойын алаңы емес, қауіпсіздік ережелерін сақтамау адам өміріне қауіп-қатер төндіруі мүмкін екенін жеткізіп, қалыптастыру. Осыған орай ҚТЖ барлық азаматтарды, әсіресе ата-аналар мен мұғалімдерді үлкен жауапкершілік таныта отырып, балаларға жүріп тұру ережелерін түсіндіруге, болат жол маңында оларды жалғыз қалдырмауға шақырады. Өйткені қауіпсіздік қашанда да бірінші орында», – деп түйіндейді сөзін Марат Арапбекұлы.