Локомотивтерге бейнетіркегіштер орнатылуда
«Қазақстан теміржолшысы» газетінің тілшісі
2025-2027 жылдарға арналған Жол картасына сәйкес «ҚТЖ-Жолаушылар локомотивтері» ЖШС бойынша 76 жолаушылар локомотивіне бейнетіркегіштер орнату жоспарланған. Соның 60 локомотиві биыл жабдықталса, осы жылдың соңына дейін тағы 5 локомотивке бейнетіркегіш орнатылмақ. Ал қалған 11 локомотив келесі жылы жабдықталады деп күтілуде.
Кәсіпорын басшылары бұл жабдықтарды орнатудағы мақсат – пойыздардың қозғалыс қауіпсіздігін қамтамасыз ету екенін айтып отыр. Себебі жол бойында жолаушылар пойыздарына зақым келтіретін жайттардың орын алып жататыны жасырын емес.
Мәселен, 2025 жылдың жеті айында шұғыл тежегішті қолдана отырып, жолаушылар пойыздарының мал-жанмен соқтығысқан 150-ден астам оқиғасы тіркелген. Әрине бұл көрсеткіш өткен жылдың есепті мерзімімен салыстырғанда 17,5% төмендеген. Десек те, бұл оқиғалардың өзі кәсіпорынға үлкен қаржылық шығын әкеліп отыр.
Локомотивтердің малмен соқтығысуы салдарынан серіктестіктің локомотивтеріне, яғни локомотивтің қаптамасы, вагондардың жылыту розеткалары, ALSN қабылдау катушкалары, жол тазалағыштар, буферлік шамдар, автотіркеу тетіктері, локомотивке көтерілуге арналған баспалдақтар және т. б. айтарлықтай зақым келген.
– Локомотивтердің зақымдануына байланысты кәсіпорын жөндеуге қатысты өндірістік емес шығындарға ұшырап отыр, ал жекелеген локомотивтер құрамдас бөліктердің болмауына байланысты ұзақ уақыт тұрып қалады. Бұл өз кезегінде жүк қозғалысынан локомотивтерді жалға алуда қосымша шығындарға, ал оның салдары жүк пойыздарының тоқтап тұруына әкеліп жатады, – дейді «ҚТЖ-Жолаушылар локомотивтері» ЖШС мамандары.