Қызылорда теміржолында күзгі комиссиялық тексеру өтті

Қызылордада күзгі комиссиялық тексеру биыл өңірдің солтүстігіндегі Сексеуіл – Қоскөл телімінде басталып, Сексеуіл – Қызылорда аралығында жүргізілді. Одан әрі Шорнақ – Шиелі– Белкөл станциялары арасында жалғасып, аймақ теміржолының барлық қыры жіті бақылаудан өтті.

Күзгі комиссиялық байқау – бүкіл шаруашылықтың, әрбір құрылғының, вагон мен локомотивтің, ғимараттар мен имараттардың, жалпы салалық нысандардың барлығын түгел сын тезінен өткізіп, әрбір бұйрық-нұсқаулықтың орындалу деңгейін таразылайтын үлкен сынақ. Қағаз бетіндегі құжаттан бастап жол бойындағы жасанды құрылыстар мен өндірістік нысандардың жағдайына дейін назарға алынады.  

Қызылордалық комиссиялық топтың құрамында Жүк тасымалы бөлімшесінің директоры Батырхан Базарбаев, бас инженер Күлхан Белкібаев, кәсіподақ ұйымының төрағасы Мұхтар Көпірбаев, Қызылорда магистральдық желі бөлімшесінің директоры Ербол Сәулебеков, Қызылорда аймақтық қозғалыс қауіпсіздігі ревизорлары аппаратының өкілдерін бастап келген Алмат Молдашев, сондай-ақ «Қазкөліккәсіп» ҚБ Қызылорда филиалының төрағасы Бауыржан Ахметов және салаға қарасты мекеме, бөлім басшылары болды.  

Байқау барысында шаруашылық-техникалық ахуал емес, сонымен бірге жеке құрамның әлеуметтік жағдайы, алдағы қысқы маусымға дайындық мәселелері де назардан тыс қалмайды. Өйткені теміржол  шылардың еңбекке деген ынтасы мен тұрмыс жағдайы да қозғалыс қауіпсіздігіне тікелей ықпал ететіні анық.  

Шорнақ пен Шиелі станциялары аралығында жүргізілген комиссиялық тексеріс барысында Қызылорда аймақтық қозғалыс қауіпсіздігі ревизорлары аппаратының өкілдері тарапынан 21 түрлі шектеу жасалды. Ревизор Әмірхан Жүсіпбековтің айтуынша, Шорнақ бекетінде анықталған басты олқылық – жай ғана техникалық ақау емес, пойыздар қозғалысына тікелей қауіп төндіретін фактор. Сол себепті ол жерде пойыздардың жылдамдығына шектеу қойылды.  

«Біз үшін ең бастысы – қозғалыс қауіпсіздігі. Бір рельстің ақауы бүтін пойыздың тағдырына әсер етуі мүмкін. Бір күн ішінде тексеру жүргізілген Шорнақ – Шиелі станциялары арасындағы телімдерде пойыз қозғалысының қауіпсіздігін қамтамасыз ету үшін 21 түрлі шектеу енгізілді. Оның ішінде бір теміржолшының талоны тәркіленіп, төрт жерде ауыстырып-қосқыш жабылды, екі жерде жолдағы жылдамдық шектелді», – дейді ревизор.  

Ал Шиеліде жүргізілген тексеріс кезінде телім бойында жаңадан жаңғыртылып пайдалануға беріліп жатқан нысандар басты назарға ілікті. Мысалы Бәйгеқұм станциясында жол жөндеушілер үшін жаңартылып, жаңғыртылған жолшылар қосыны комиссия тарапынан жоғары баға алды. Желі бойында жүретін жолшылар үшін барлық жағдай жасалған, жол жөндеушілердің құрал-саймандарын сақтайтын орын да қарастырылған.