Жамбылдық теміржолшылардың қауіпсіздік ұстанымы

Өндірістегі қауіп-қатердің алдын алудың ең маңызды қадамы – қауіпсіз еңбек жағдайын жасау. Өмірі мен денсаулығы қорғалатын, әлеуметтік көңіл күйі тұрақты адам жұмыста сергек жүреді. Өзіне сенімді, жауапкершілікті толық сезіне алады.

Бұл – Қазақстан темір жолының басты ұстанымы. Сондықтан «ҚТЖ-Жүк тасымалы» ЖШС Жамбыл филиалының басшылығы өндірісте нөлдік жарақат жағдайына қол жеткізу үшін қауіп-қатердің алдын алуға, ең бірінші кезекте теміржолшылардың қауіпсіз ортада еңбек етуіне жағдай жасауға бірінші кезекте басымдық береді.  

– Қай салада болмасын жұмыс істеуге қауіпсіз әрі қолайлы орта қалыптастыру еңбекті қорғаудың ең маңызды қадамы саналады. Басты мақсат – әрбір қызметкердің өмірі мен денсаулығын сақтау. Ал қауіпсіздік ережелері мен талаптарын бұлжытпай орындау жұмысшының, әр маманның қызметтік міндеттеріне жатады. Біз филиалға қарасты құрылымдық бөлімшелердегі еңбек қауіпсіздігіне жауапты инженерлерден осыны қатаң қадағалап отыруды талап етеміз. Филиал бойынша былтыр және 2026 жылдың бірінші тоқсанында өндірістік жарақат алу жағдайлары болған жоқ. Басты мақсат – еңбек қауіпсіздігі әрбір жұмыс процесін айқындайтын іргелі құндылық болып табылатын көшбасшылар қатарына кіру. Сондықтан жұмысшылардың әлеуметтік көңіл күйі, психоэмоционалдық жағдайы тұрақты ортаны қалыптастыруға, өндірістік жарақаттың алдын алу және еңбек қауіпсіздігі мәдениетін сақтауға ықпал етеді. Осы мақсатта жыл сайын филиалда жауапты инженерлерге тренингтер мен дәрістер өткізіліп тұрады, – дейді еңбек қауіпсіздігі және еңбекті қорғау, экология жөніндегі жетекші инженері Бексұлтан Келіс.  

Айтуынша, өндіріс жағдайында түрлі қауіп-қатердің алдын алу үшін арнайы киім мен аяқ киім, басқа да жабдықтар тозу мерзімі бойынша жаңартылып беріліп, жұмысшыларды дер кезінде толық қамтамасыз етілуі де үнемі назарда. Бұл да қауіпсіз еңбек жағдайын жасаудың бір шарты.  

Еңбекті қорғау мақсатында жоспарға сәйкес ұйымдастырылатын іс-шаралар қатарында әр маманға алғашқы медициналық көмек көрсетуді үйрететін техникалық сабақтар да бар. Сондай-ақ филиал басшылығы жыл сайын 28 сәуір – Дүниежүзілік Еңбекті қорғау күніне орай кәсіподақ ұйымымен бірлесіп, кеңейтілген кеңестер, семинар, дөңгелек үстел отырыстарын ұйымдастырып, онда еңбек қауіпсіздігін сақтап, қауіп-қатердің алдын алуда көзге түскен құрылымдық бөлімшелерді марапаттап отырады.  

Сонымен қатар Дүниежүзілік еңбекті қорғау күні тақырыбында плакаттар, аншлагтар орналастыру бойынша кіші конкурстар ұйымдастырылады.