Еңбекті қорғауда ешқандай қысымға жол жоқ

Еңбек ұжымдарында ешқандай стрестік жағдайларға жол берілмеуі тиіс. 2026 жылы еңбек заңнамаларына қатысты өзгерістер мен толықтырулар енгізілді. Енді маусымнан бастап Қазақстанда еңбек қатынастарын рәсімдеуге бақылау бұрынғыдан да күшейтіледі.

Өндіріс жағдайында еңбекті қорғауда неге мән беру керек? Қазіргі талаптар қандай? «ҚТЖ – Жүк тасымалы» ЖШС Жамбыл филиалында өткен дөңгелек үстел барысында тараптар осы мәселелерді талқыға салып, Еңбек қауіпсіздігі және еңбекті қорғау, экология жөніндегі инженерлерге құқықтық тұрғыда кеңес берілді.

«ҚТЖ – Жүк тасымалы» ЖШС Жамбыл филиалының бас инженері Дүйсенбек Сыдықов 28 сәуір – Дүниежүзілік Еңбекті қорғау күніне орай филиалдың құрылымдық бөлімшелерінде семинар, конкурстар, дөңгелек үстел отырыстары ұйымдастырылғанын атап өтіп, қауіпсіз жұмыс жағдайын қалыптастырудағы жаңа талаптарды түсіндіруге басымдық берілгенін жеткізді.  

– «Адам. Қозғалыс. Болашақ». Осы үш басымдық – біз үшін аса маңызды. Қазақстан темір жолының басты ұстанымы. Биыл 28 сәуір – Дүниежүзілік Еңбекті қорғау күнінде «Қолайлы психоәлеуметтік жұмыс ортасы – жұмысшылардың өркендеуіне және күшті ұйымға апаратын жол» тақырыбының алға шығуында үлкен мән бар. Қауіпсіз еңбек ортасын қалыптастыруда әр қызметкердің әлеуметтік көңіл күйі маңызды, - дейді Дүйсенбек Сыдықов.

Жамбыл облысы бойынша мемлекеттік еңбек инспекторы Бақытжан Құраметов, Жамбыл бөлімшелік көліктегі санитариялық-эпидемиологиялық бақылау басқармасының мамандары Светлана Георгиевна, Сәуле Қожанбекова еңбекті қорғаудағы талаптарды түсіндіріп, қандай мәселелерге назар аудару керек екенін атап өтті.

Дөңгелек үстел отырысына Сарышаған, Шу, Түрксібтегі құрылымдық бөлімшелердің жауапты мамандары онлайн режимде қатысып отырды. Туындаған сұрақтарын қойып, мамандардан кеңес алды.

Еңбекті қорғау талаптары мен ережелері  Жамбыл локомотив пайдалану депосында өткен семинарда да қозғалды. Ауқымды іс-шарада еңбек қауіпсіздігін сақтауда үздік үлгі көрсеткен қызметкерлерге «Қазтеміржолкәсіп» ҚБ-нің Жамбыл филиалының атынан сый-сияпаттар тапсырылды.

– Дүниежүзілік Еңбекті қорғау күніне орай ұйымдастырылған іс-шаралар үздік қызметкерлерді марапаттау салтанатымен қорытындыланды. 7 маман «ҚТЖ - Жүк тасымалы» ЖШС бас директоры А. Үмбетовтің, 3 қызметкер «Жамбыл» филиалының директоры А. Сеитбенбетовтің Алғыс хаттарымен марапатталды.

Сондай-ақ Еңбек қауіпсіздігі және еңбекті қорғау, экология жөніндегі инженерлер өндіріс орындарында қауіпсіздікті сақтау ережелерін түсіндіретін буклеттер мен парақшалар таратып, шойын жол бойында жүрудің және жұмысшы пойыз келе жатқанда қандай талаптарды сақтауы керектігін айтып, түсіндіру жұмыстарын жүргізді. Жыл басынан бері «Жолда адам» айлығы екі рет жарияланды. Жолдағы қауіпсіздікті де ұмытпауымыз қажет, - дейді филиалдың Қауіпсіздік және еңбекті қорғау, экология бөлімінің бастығы Медет Қарымбаев.