Бес жылда – жеті оқиға
Маңғыстау облысы бойынша меншікті тілші
Статистикалық мәліметтерге сүйенсек, 2020-2025 жылдар аралығында Маңғыстау облысы аумағындағы теміржол өткелдерінде 7 жол-көлік оқиғасы тіркелген.
Соның ішінде 5 оқиға Мұнайлы ауданына қарасты Маңғыстау – Жаңаөзен учаскесіндегі Бекет «Р» – Бекет «Боржақты» бағытының 13-шақырымдағы күзетілмейтін теміржол өткелінде болған.
– Аймақтағы соңғы бес жылдың деректерін сөйлетсек, теміржолда жеті рет жол-көлік оқиғасы болыпты. Оның бесеуі теміржол өткелінде, қалғаны белгіленбеген орындарда. Бұл жағдайдың бәрі де автокөлік тізгіндеушілердің қателігінен туындаған. Теміржол көлігі өз жолымен келе жатады, онда автожолдағы секілді алдынан шыққан темір тұлпарды айналып өту, жол беру немесе жеңіл машиналар сияқты бірден тоқтау мүмкіндіктері жоқ. Жедел тежеу бергеннің өзінде біраз жерге барып бір-ақ аялдайды. Сондықтан автокөлік тізгіндеушілерге теміржолдан өту ережесін таныстырып, қайта еске салудан жалықпаймыз. Қазір соған байланысты аудан тұрғындары мен көлік жүргізушілеріне қауіпсіздік шараларын қатаң сақтау қажеттігін ескертіп жатырмыз. Бір сәттік немқұрайлылықтың орны толмас қайғылы жағдайларға алып келуі мүмкін екенін БАҚ арқылы жариялап, буклеттер таратып, профилактикалық жұмыстар жүргізіп жатырмыз, – деген Маңғыстау жол дистанциясының жетекші инженері Мұхтар Кульчанбаев теміржол өткеліне жақындағанда жылдамдықты төмендету, жол белгілері мен бағдаршам талаптарына бағыну, пойыздың жақындап келе жатқанына көз жеткізбей өткелден өтпеу, қарсы бағыттағы көліктерге қарамастан қауіпсіз арақашықтық сақтау секілді ережелерді қатаң сақтау ең алдымен әр жүргізушінің қауіпсіздігі екенін ескертеді.