Сайөтес станциясында «Қауіпсіз жол» профилактикалық іс-шарасы өтіп жатыр

Маңғыстау теміржолының Сайөтес станциясында «Қауіпсіз жол» жедел профилактикалық іс-шарасы жүргізілуде. Жергілікті теміржолшылар мен желілік полиция қызметкерлері теміржол жолағында мал жаюдың алдын алу бойынша тиісті жұмыстар ұйымдастыруда.

Іс-шара аясында Шетпе және Жармыш ауылдарындағы мал шаруашылығымен айналысатын шаруа қожалықтарының иелерімен кездесулер өтті. Темір жол бойында тұратын, мал шаруашылығымен айналысатындар ескеретін ережелер, темір жолдың бөлінген жолағында мал жаюға болмайтыны, қанша қашықтыққа рұқсат етілетіні жан-жақты түсіндірілді. Қараусыз жүрген малдың темір жолға шығып кетуі ауыр зардаптарға, оның ішінде пойыз қозғалысының қауіпсіздігіне қауіп төндіріп, материалдық шығын мен адам өміріне қатер әкелуі мүмкін екені ескертілді. Жалпы, станцияда теміржол қозғалысына төрт түліктен келетін қауіп-қатердің алдын алу бағытында шаруа қожалықтары иелері, тұрғындарға мұндай профилактикалық жұмыстар ай сайын өткізіледі екен.  

– Жыл басынан бері біздің аумақтағы темір жолда сегіз рет мал басу оқиғасы тіркелді. Оның бесеуінің иесі анықталып, әкімшілік хаттама толтырылды. Түсінік жұмыстарын өткен жылғыдан көбейтудің нәтижесінде салыстырмалы деңгейде мал басу жағдайы былтырғыдан екі дерекке азайды. Жалпы, темір жол бойында тұратын әрбір тұрғын өзі үшін де, төрт түлігі үшін де жауапкершілік жүктейтінін естен шығармау керек. Сонымен қатар Мемлекет басшысы айқындаған «Заң мен тәртіп» қағидатын іске асыру мақсатында жуырда станцияға келіп-кететін жолаушылар пойыздарында түсіндіру жұмыстарын жүргіздік. Заң мен тәртіп – қоғам қауіпсіздігінің кепілі екенін басшылыққа алып, вагондағы, перрондағы жолаушыларға, тұрғындарға оны бұзудың салдары ескертілді. Сонымен қатар теміржол нысандарында, вагонда күмәнді адамдар мен заттарды байқаса, дереу полиция қызметкерлеріне немесе теміржол қызметкерлеріне хабарлау қажеттілігі айтылды, – дейді Сайөтес станциясындағы желілік полиция бөлімшесі басшысы Нұрлыбек Рахметов.