Қауіпсіздік талаптарын сақтау – міндет

Семей қаласындағы теміржол өткелдерінде жыл басынан бері үш мәрте жол-көлік оқиғасы орын алыпты. Екеуінде жеңіл көлік, ал біреуінде тіпті жолаушылар автобусы маневрлік пойызбен соқтығысқан. Абырой болғанда адамдар зардап шеккен жоқ. Десек те, соңғы уақыттарда мұндай жайттардың жиілеуі теміржолшылар қауымын алаңдатып отыр.

Жыл басынан бері Семей локомотив пайдалану депосы қызмет көрсететін телім бойында жалпы саны 71 рет шұғыл тежеу жағдайы орын алыпты. Оның арасында автокөлік жүргізушілерінің бағдаршам белгісіне қарамай теміржол өткелі бойына шығып кетуі сынды жайттар да тіркелген. Осындай келеңсіздіктердің алдын алу мақсатында жуырда семейлік локомотившілер желілік полиция өкілдерімен бірге республикалық «Заң мен тәртіп» қағидаты аясында қала ішіндегі қозғалыс жиілігі аса жоғары теміржол өткелдері бойында арнайы акция өткізді.  

Жалпы, қазіргі күні семейлік теміржолшылар қауымы желілік тәртіп сақшыларымен бірге профилактикалық іс-шаралар өткізуді жолға қойған. Мәселен, жыл басынан бері теміржолдан өту тәртібін өрескел бұзу фактілері бойынша 1363 хаттама толтырылыпты. Қынжылтары – бір рет айыппұл төлеген азаматтардың екінші рет тәртіп бұзу жайттары да тіркелген екен. Қала ішімен өтетін теміржол арқылы тәулігіне 30-дан 50-ге дейін жылжымалы құрамдар өтеді. Яғни қауіпсіздікке қойылар талап тым қатаң, алаңдауға негіз бар.

– Семей қаласы бойынша ең қауіпті өткелдердің бірі Жансая базары аумағында орын тепкен. Бұл жерде көлік қозғалысы да жиі, жаяу жүргіншілер нөпірі де мол. Адам басу оқиғалары да тіркелді. Жалпы, шаһар ішіндегі кез келген теміржол өткелінің өзіндік қаупі бар. Себебі көптеген өткелдерде шлагбаум жоқ. Қозғалыс барысы тек бағдаршаммен реттеледі. Ал кейбір көлік жүргізушілері оны елей бермейді де өткел үстіне шығып кетеді, – дейді ТЧЭ-24 мекемесінің басшысы Дархан Қажығұлов.  

Бүгінде семейлік тепловоз шаруашылығының мамандары қауіпсіздік шараларын күшейткен. Мәселен, депоға қарасты барлық тепловоздар 360 градустық бейнебақылау камераларымен жабдықталған. Бұл жүйе теміржол бойында болған барлық тосын оқиғаларды толық тіркеп, олардың себеп-салдарын анықтауға, зерттеп-зерделеп талдау жасауға мүмкіндік береді. Алайда мамандар теміржол бойындағы қаупсіздікті сақтау бірінші кезекте қарапайым ережелерді есте ұстау екендігін айтады. Сол себептен де осынау акция барысында теміржолшылар автокөлік жүргізушілеріне жадынамалар таратып, өткелде қауіпсіздік талаптарын қатаң сақтау әр көлік жүргізушісі мен жаяу жүргіншінің міндеті екенін еске салды.  

«ҚТЖ» ҰК» АҚ бастамасымен «Заң мен тәртіп» қағидаты аясында «Қауіпсіз өткел» акциясы еліміздің барлық теміржол желісінде тұрақты түрде ұйымдастырылуда.