Қауіпсіз өткел: Шымкент жол дистанциясында профилактикалық акция өтті
«Қазақстан теміржолшысы» газетінің тілшісі
«Заң мен тәртіп» тұжырымдамасы аясында «Қауіпсіз өткел» республикалық профилактикалық акциясы жалғасуда. Кезекті іс-шара теміржол өткелдеріндегі қауіпсіздікті қамтамасыз ету және жол-көлік оқиғаларының алдын алу мақсатында Шымкент жол дистанциясында өтті.
Түркістан облысы, Ордабасы ауданына қарасты теміржол өткелдерінде өткен іс-шараға Шымкент жол дистанциясының бастығы Дәурен Бахиев, Түркістан облысы бойынша Көліктік бақылау инспекциясының бас маманы Асқар Исмағұлов, Түркістан облысы Ордабасы АПБ ККБ учаскелік инспекторлары полиция майоры Ербол Суханов пен полиция лейтенанты Бақберген Төлеген қатысты.
Акция Шымкент – Арыс теліміндегі Игілік – Бадам, Қалаш – Арыс2 бекеттері аралығындағы үш теміржол өткелінде ұйымдастырылды. Шымкент – Арыс телімінде тәулігіне орта есеппен 35 жұп жүк пойызы мен 12 жұп жолаушылар пойызы өтеді. Сонымен қатар 3 өткелді қоса есептегенде күніне шамамен 10 мыңға жуық жеңіл және жүк автокөлігі қатынап, аудан аралық автобустары жүреді.
Аталған өткелдер арқылы Ордабасы ауданына қарасты Бадам ауылынан 5 мыңнан аса, Карабастау ауылынан 3 мыңнан аса, Жұлдыз ауылынан мыңнан аса адам тұрақты түрде қатынайды. Бұдан бөлек, бұл бағыт арқылы Шымкент қаласымен Арыс қаласына тәулік бойы үздіксіз көлік қозғалысы жүзеге асырылады.
Осыны ескерген акцияға қатысушылар автокөлік жүргізушілерін барынша қамтып, теміржол өткелдерінен өту кезінде жол қозғалысы ережелерін қатаң сақтау қажеттігін түсіндірді. Жүргізушілерге арнайы дайындалған ақпараттық жадынамалар таратылып, қауіпсіздік талаптарын сақтау жөнінде кеңестер берілді.
Іс-шара барысында 104 жеңіл автокөлік және 16 жүк көлігінің жүргізушісі қамтылып, оларға акцияның мақсаты мен маңызы жан-жақты түсіндірілді. Теміржол өткелдері – аса қауіпті аймақтардың бірі. Осыған байланысты ұйымдастырушылар жүргізушілерді бағдаршамның тыйым салатын белгілерін қатаң сақтауға, жабылып жатқан немесе жабық тұрған шлагбаумнан өтпеуге, сондай-ақ жақындап келе жатқан пойыз алдында қауіп төндіретін әрекеттерге жол бермеуге шақырды.