Маңғыстауда рейдтік іс-шаралар жалғасуда
Маңғыстау облысы бойынша меншікті тілші
Маңғыстау станциясындағы теміржол өткелдерде «Қауіпсіз өткел» республикалық акциясы жүргізіліп жатыр. Бірнеше бекетте ұйымдастырылған рейдке қатысушылар автокөлік жүргізушілерін тоқтатып, өз құзыреттілігі шеңберінде түсінік берді.
Маңғыстау жол дистанциясының қызметкерлері мен жергілікті аудандық әкімдіктердің ішкі саясат, жол шаруашылығы бөлімдерінің мамандары, жол полициясының инспекторлары бірлесе өткізген акция алдымен Маңғыстау станциясы 2-шақырымдағы өткелде өтіп, келесі күні Шетпе станциясындағы 314-шақырымда, ал 10 тамызда Маңғыстау станциясы мен Тамақ бекеті аралығындағы өткелде жалғасты.
Дистанция өкілдерінің айтуынша, мұндай рейд алдағы уақытта Жаңаөзен станциясы бойынша 178, 179-шақырымдардағы, Шетпе станциясындағы 305-шақырымдағы, №16 бекет бойынша 388-шақырымдағы, Маңғыстау станциясының 13-шақырымындағы теміржол өткелдерінде өткізу жоспарланған.
– Республикалық акция барысында теміржол өткелдерінде және оған жақын маңдағы көлік көп жүретін орындарда болып, профилактикалық жұмыстар жүргізудеміз. Жолдан өткен автокөліктерді, оның ішінде автобус, жүк көліктері мен жеңіл автомобильдерді тоқтатып, теміржол өткелінен өтуде сақ болу туралы түсінік берілуде. Автокөлік жүргізушілерінің теміржол өткеліне жақындағанда ескеруге тиіс ережелерді есіне салып, келе жатқан пойызды, ескерту белгілерін көре тұра пойыздан бұрын өтіп кетемін деудің салдары орны толмас өкінішке алып келуі мүмкін екені айтылды, тиісті заңдылықтар мен ескертулер жазылған жадынамалар таратылды, – дейді Маңғыстау жол дистанциясының жетекші инженері Мұхтар Кульчанбаев.