Сексеуіл мен Аралда ауқымды рейд өтті

Сексеуіл жол дистанциясында республикалық «Заң мен тәртіп» тұжырымдамасы аясында «Қауіпсіз өткел» акциясы өтті. Дистанция телімінің Сексеуіл – Құрлық станциялары аралығындағы II санатты теміржол өткеліне жиналған рейдке қатысушылар автокөлік иелерін тоқтатып, қауіпсіздік талаптарын түсіндіріп, жадынамалар таратты.

есеппен 248 автокөлік өтсе, Арал теңізі станциясы маңындағы II санатты күзетілетін теміржол өткелінен бір сағатта шамамен 280 автокөлік өтеді екен.

Сексеуіл жол дистанциясының қызмет көрсету аумағындағы Сексеуіл – Қоскөл, Сексеуіл – Қазалы және Сексеуіл – Шалқар бағытындағы 364,2 шақырымда 15 теміржол өткелі бар. Оның 3-і күзетілетін болса, 12 өткел күзетілмейді.

Теміржол өткелдері – автомобиль және теміржол көліктері қозғалысы түйісетін қауіпті аймақтардың бірі. Сондықтан әрбір жүргізуші мен жаяу жүргінші жол қозғалысы ережелерін қатаң сақтап, өткелден өту кезінде ерекше сақтық танытуы қажет. Қауіпті жағдай туындаса, тепловоз машинисі жедел тежегіш қолданғанмен, пойыздың тежеу жолы ең кемі 500 метрге жететіндіктен, пойызды бірден тоқтатуы мүмкін емес. Осы себепті өткелдегі әрбір ереже бұзушылық адам өміріне қауіп төндіруі мүмкін.

– «Қауіпсіз өткел» республикалық акциясы аясында Сексеуіл жол дистанциясына қарасты Сексеуіл – Құрлық станциялары аралығындағы 2318-шақырымның 8-жүздігінде орналасқан II санатты теміржол өткелінде және Арал теңізі станциясы маңындағы 2371-шақырымның 1-жүздігінде орналасқан II санатты күзетілетін теміржол өткелінде кең көлемді профилактикалық жұмыстар ұйымдастырылды. Іс-шараға Сексеуіл жол дистанциясының теміржолшылары, Арал теңізі және Сексеуіл станцияларындағы көліктегі полиция бөлімінің қызметкерлері, сондай-ақ Арал қаласы мен Сексеуіл кенті әкімдіктерінің өкілдері қатыстырылып, автокөлік иелері мен жаяу жүргіншілерге темір жолдың аса қауіпті аймақ екендігі тағы бір мәрте түсіндірілді, – дейді Сексеуіл жол дистанциясының басшысы Мұрат Байділдаев.  

Акция барысында жүргізушілерге жол қозғалысы ережелерін сақтау, теміржол белгілері мен бағдаршамдардың талаптарын мүлтіксіз орындау, өткелге жақындағанда жылдамдықты төмендету, тыйым салынған белгі немесе дыбыстық дабыл берілген кезде темір жолды кесіп өтпеу қажеттігі жөнінде түсіндіру жұмыстары жүргізілді. Теміржол өткелдеріндегі жолкөлік оқиғаларының негізгі себептері жүргізушілердің жол қозғалысы ережелерін сақтамауы, теміржол белгілеріне немқұрайлы қарауы және өткелден өту кезінде асығыстық танытуы екені, ал мұндай жағдайлар тек материалдық шығынға ғана емес, адам өміріне қауіп төндіріп, пойыздар қозғалысының бұзылуына да әкелуі мүмкін екендігі айтылды.  

Алдағы күндері Бесарық және Шорнақ станцияларында да осындай рейд өтетін болады.