Апаттың алдын алғандар

ҚТЖ-ның локомотив бригадалары 2026 жылдың басынан бастап теміржол өткелдерінде 39 жол-көлік оқиғасының алдын алды. Машинистердің кәсібилігі мен қырағылығының нәтижесінде апатты жағдайларға жол берілмеді.

Сала мамандарының айтуынша, барлық оқыс оқиғалар автокөлік жүргізушілерінің кінәсінен орын алған. Олар пойыздың жолына шығып кетіп дабыл талаптарын сақтамаған немесе көлік құралының ақаулығына байланысты өткелден дер кезінде өтіп кете алмай қалады.  

Мәселен, 29 тамызда жүк пойызы Матай – Ақтоғай учаскесінде сағатына 37 км/ сағ жылдамдықпен жүріп келе жатып, Қаратас – Көкшалғын өткелінде машинист КамАЗ жүк көлігін байқап қалған. Ол 300 метр қашықтықта шұғыл тежеуді қолданып, соқтығысудың алдын алды. Жүк көлігінің жүргізушісі оқиға орнынан кетіп қалған. Пойыздың кешігуі 18 минутты құраған. Ақпарат Үштөбе станциясының полициясына берілді.  

Ал 27 тамызда Көкшетау – Жамантұз аралығында жүк пойызының машинисі 60 км/ сағ жылдамдықта келе жатып шұғыл тежеуді қолдануға мәжбүр болған. Нәтижесінде жеңіл автомобильмен соқтығысудың алдын алды. Көлік жүргізушісі мұнда да оқиға орнынан қашып кетті. Ақпарат құқық қорғау органдарына берілді. Келесі бір оқиға, 9 шілдеде Тобыл – Әйтеке би учаскесінде болған. Жүк пойызының машинисі 75 км/сағ жылдамдықпен келе жатып шұғыл тежеу беріп, реттелетін өткелде трактормен соқтығысудың алдын алған. Ал 10 шілдеде Тобыл – Жітіқара учаскесінде пойыз жүргізушісі Toyota автокөлігінің өткелге шығуына байланысты 65 км/ сағ жылдамдықпен төтенше тежеуді қолданды. Бұл оқиғада да көлік жүргізушісі Жол қозғалысы ережелерін өрескел бұзған.  

Мамандар қауіпті жағдайлар ережелерді бұзудан ғана туындамайтынын, кейде автомобильдің техникалық ақаулығы да себеп болатынын жасырмайды. Айталық, 12 тамызда Қарағанды – Сұрыптау – Астана учаскесінде Volkswagen автокөлігі техникалық ақаулығына байланысты тура өткелге келгенде тоқтап қалған. Салмағы 1,1 мың тоннадан асатын пойыз 76 км/сағ жылдамдықпен келе жатып, шұғыл тежеу беріп үлгерген. Жолды тез босатқанмен пойыз 10 минутқа кешікті. 19 шілдеде Алматы-1 – Сарыөзек учаскесінің Байсерке – Қайрат өткелінде ұзын өлшемді автовоз да кенеттен тұрып қалған. Машинист 56 км/сағ жылдамдықта келе жатып шұғыл тежеуді қолданып, соқтығысудың алдын алды. 4 шілдеде Махамбет станциясында №62 қалалық маршруттың автобус жүргізушісі 3 км/сағ жылдамдықпен жылжып келе жатқан жылжымалы құрамға жол бермеді. Мұнда да жүргізуші оқиға орнынан кетіп қалған. Зардап шеккендер жоқ, жылжымалы құрамға да залал келмеді. Ақпарат полицияға берілді.  

ҚТЖ мамандары, теміржол өткелінде жүргізушінің қателігі оның және жанындағы адамдардың өміріне қауіп тудыруы мүмкін екенін, сондықтан өткелдің алдында жылдамдықты төмендету, қауіпсіздікті қамтамасыз ету және бағдаршам мен шлагбаум сигналдарына бағыну қажет екендігін еске салады. Егер автомобиль жол үстінде ақауы сыр беріп тұрып қалса, өткелден мүмкіндігінше тез кетіп, бұл туралы жедел қызметтерге хабарлау қажет. Ең қауіпсіз нұсқа – егер көлік қозғалысына тыйым салынса, жолға шықпау және әрқашан пойызға жол беру.