Семейде желілік полиция қызметкрлері «Ұрлық» жедел профилактикалық іс-шарасын өткізді
Абай облысы бойынша меншікті тілші
Семей ЖТ бөлімшесі бойынша желілік полиция қызметкерлерінің ұйымдастыруымен теміржол нысандары мен желі бойындағы ұрлық-қарлықтың алдын алу және орын алған қылмыстарды ашу мақсатында «Ұрлық» атты жедел профилактикалық іс-шара өткізілді. Қылмыстың үлкен-кішісі жоқ. Акция барысында ұсақ бұзақылық, оның ішінде қоғамдық орындарды ластау, ішімдік ішу, шылым шегуге салынған тыйымды бұзу, жұртшылықтың мазасын алу, сонымен қатар теміржол бойындағы белгіленбеген орындарда сауда жасау сынды заңбұзушылық фактілер тексерілді. Мұнымен қатар, кәмелетке толмағандардың түнгі уақыттағы бейсауат жүруі сынды келеңсіздіктерге де назар аударылды. Іс-шара барысында қоғамдық орындарда, теміржол көліктерінде қылмыстар мен құқық бұзушылықтардың алдын алу және болдырмау мақсатын көздеген тәртіп сақшылары жұртшылықтың құқықтық мәдениетін көтеруге де күш салды.
–Тәртіп бұзған жәнежүріс-тұрысы күдік тудырған бірқатар азаматтар бөлімшеге жеткізіліп, анықтамалық есептер бойынша тексерулер жүргізіліп, кейбір тұлғалар дактилоскопия- лау және фото-бейнесуретке түсіруден өткізілді. Мақсат – оларды криминалистикалық есепке алу, бұрын жасаған қылмыстарға қатыстылығының бар-жоғын анықтау болатын, – дейді бұл орайда Семей станциясындағы ЖПБ әкімшілік полиция бөлімінің бастығы Рүстем Әбеуов.
Жалпы, мұндай акциялар бөлімше бойынша жиі ұйымдастырылады. Сондықтан да болар, өрескел түрдегі басбұзарлық фактілер тіркелген жоқ.