Арыс локомотив пайдалану депосының үздік қызметкерлері түрлі марапатқа ие болды
Шымкент қаласы бойынша меншікті тілшісі
Құрамында локомотивтерге техникалық қызмет көрсету пункті, құммен жабдықтау қоймасы мен Шымкент айналым депосы бар Арыс локомотив пайдалану депосының ғасырдан астам тарихы бар. Шымкент жүк тасымалы бөлімшесі бой- ынша жүк және жолаушылар құрамын тасымалдау міндетін үздіксіз қамтамасыз етіп келе жатқанына да сонша жыл. Қызмет көрсету ауқымы да кең: Арыс-Тараз-Арыс және Арыс-Сарыағаш-Арыс бағытында жүк тасымалдау қызметтерін атқарады. Локомотив пайдалану паркі 97,5 бірліктен тұрады, оның ішінде жүк тасымалдау қозғалысында ВЛ80с маркалы электровоздар 55,5 бірліктен және KZ8A маркалы отандық электровоздар 6 бірлікті құрайды. Осы жылдың он айлық көрсеткіші бойынша атқарылған жұмыс есебі жоспардан жүз пайызға асыра орындалып отыр. Сонымен қатар, депоның ТО-2 циклды локомотивтерге техникалық қызмет көрсеті пункті пойыздар қозғалыс қауіпсіздігін қамтамасыз етуге ауқымды үлес қосып келеді. Жыл басынан бері ВЛ80с маркалы электровозы мен ВЛ40с маркалы электровозы, ВЛ60Пк маркалы электровозы, ТЭМ-2 маркалы тепловозына, барлығы 7309,5 бірлік локомотивке тиісті техникалық қызметтер көрсетілген. Биыл Арыс локомотив пайдалану депосының пойыздар қозғалысының қауіпсіздігін сақтауды арттыруға үлес қосып жүрген бір топ озаттары түрлі марапаттарға ие болды. Атап айтқанда, «Адал еңбегі үшін» төсбелгісімен Берік Арысбаев, «Кәсібі бойынша үздік» төсбелгісімен Темірхан Салимбаев, Компания басшылығының Құрмет грамотасымен Саттар Дауылбаев және Қонысбек Қуатбеков, Компания басшылығының Алғыс хатымен Қуатбек Жандарбекұлы, Уали Ақатайұлы және Базарбай Мұстафаұлы марапатталды.