Арыс-Түркістан және Арыс-Түлкібас телімдеріндегі жөндеу жұмыстары пойыз кестесіне әсер етті
Шымкент қаласы бойынша меншікті тілшісі
Шымкент жүк тасымалдау бөлімшесі жыл басынан бері қозғалыс қауіпсіздігін қамтамасыз ету, тасымалданатын жүктердің сақталуы, қауіпсіздік техникасын және еңбек қорғау шарттары мен тәртібін сақтау бойынша оң нәтижеге қол жеткізді. Мәселен, эксплуатациялық көрсеткіштерге тоқталсақ, жергілікті вагон мен транзиттік вагон, жүк айналымы, пойыздың орташа салмағы жүз пайызды құраған. Ал кейбір көрсеткіштердің межеге жетпей қалуының да өзіндік себеп-салдары жоқ емес. Мамандар оны ең алдымен Өзбекстан темір жолының Сарыағаш түйіспесінен, сонымен қатар Алтынкөл, Достық халықаралық түйіспелерінен пойыздардың уақытылы жөнелтілмеуі салдарынан 3974 пойыздың 24 мыңнан астам сағатқа тұрып қалуынан деп түсіндіреді. «Тастанды» пойыздар дың шекара маңына жинақталып қалуында қазақстандық тараптың кінәсі жоқ, бұл мәселе үкіметтік деңгейде шешіліп жатқаны да белгілі. Бұдан бөлек, бөлімше бойынша жолдарға берілген ескертулер де көбейіп кеткен, яғни орта тәулікте жоспар бойынша 27 ескерту болу керек болса, іс жүзінде 43 ескерту болған. Пойыздардың қозғалыс кестесінің сақталуына да кемшілік жоқ емес, он айда жолаушылар пойыздарының кідірісі өткен жылмен салыстырғанда артып кеткен. Шымкент жүк тасымалы бөлімшесінің техникалық бөлімі мамандары мұның себебін Арыс-Түркістан және Арыс-Түл- кібас телімдерінде жол жөндеу жұмыстарының жүргізілуіне байланысты деп түсіндірді. Техникалық бөлімнің бастығы Талғат Якупов өткен он айда жүк пойыздарының жүрісі жоспарға сай орындалып, өткен жылмен салыстырғанда көрсеткіштер жақсара түскенін жеткізді.
«Пойыздар қозғалысының варианттық кестеге сай жүруі бойынша 70 пайыздық меже тапсырмасы толығымен орындалды», – деді ол.
Сонымен қатар, өткен жылмен салыстырғанда табыс 3 млрд 50 млн 442 мың теңгеге өскені де жаман көрсеткіш емес.