Теміржол саласына ерекше ұлес қосқан қызылордалықтардың еңбегі еленді

Ел тәуелсіздігінің 30 жылдығы қарсаңында Қызылорда теміржолында өткен салтанатты шарада Әнұран шырқалып, еңбек озаттары марапатқа кенелді. Бөлімше басшылары Батырхан Базарбаев пен Ибраким Басықараев әріптестерін мерекемен құттықтап, қажырлы еңбектеріне алғыс айтты. Теміржол саласында ерен еңбектің үлгісін көрсеткен озаттарға ҚР Индустрия және инфрақұрылымдық даму министрлігінен, «ҚТЖ» басқарма төрағасынан, Облыс әкімдігінен, «Нұр Отан» партиясының облыстық филиалынан, Облыстық жолаушылар көлігі және автомобиль жолдары басқармасынан, «Қазкөліккәсіп» бірлестігінен түрлі марапат тапсырылды. «Құрметті теміржолшы» төсбелгісінен бастап, «Адал еңбегі үшін», «ҚР тәуел- сіздігіне 30 жыл», «Үздік басшы», «Үздік маман» төсбелгілері теміржолшылардың кеудесінде жарқырап, құрметке бөледі. Тасымалдау қызметіне ерекше үлес қосқан бір топ машинистер есімі депоның «Құрмет кітабына» енгізіліп, алғыс хат алғандар қатары еселеп артты. Құзырлы құрылымдар мен мекеме басшыларының марапатынан бөлек, тәуелсіздік құрдастарының арнайы дайындаған ән шашуы салтанатты шараның сәнін келтіріп, ажарын аша түсті. Марапатқа боленген аға-апаларына арнап кішкентай бүлдіршіндердің де мерекелік тартуы бар екен. «Сыйға – сый, сыраға – бал» демекші, көпшілікке көтеріңкі көңіл-күй сыйлаған өнерпаздарға ұжым кәсіподағы атынан әзірленген сыйлықтар табыс етілді.