Ақмола теміржол колледжінде тәуелсіздіктің 30 жылдығына орай мерекелік шара ұйымдастырылды
Қазақ көлік және логистика академиясының филиалы – Ақмола теміржол колледжінде Қазақстан Рес- публикасы тәуелсіздігінің 30 жылдығына арналған «Тәуелсіздік – ел бақыты» атты ауқымды іс-шара өтті. Білім ошағының басшысы Амангелді Молгаждаров көпшілікті еліміздің ұлық мерекесі Тәуелсіздік күнімен құттықтап, салтанатты шараға арнайы шақырылған қонақтар мен теміржолшы ардагерлерге алғыс айтты. Жиналғандар студенттердің театрландырылған қойылымын тамашалап, патриоттық әндерден концерт тыңдады. Өнерлі жастар тарихи қойылымдарды сонау Ақтабан шұбырындыдан бастап, Октябрь революциясы, Ұлы Отан соғысы кезеңі, «Желтоқсан желі ызғарлы» бөлімінде кешегі азаттыққа ұмтылған жастар бейнесін сахнада тамаша сомдай білген. «Тұғыры биік тәуелсіздік» атты соңғы бөлімде егеменді елдің таңы атқан бақытты кезеңді бейнеледі. Кезек концерттік бағдарламаға ауысып, патриоттық әндер шырқалды. «Туған жер» әні «Алаш аманаты» күйімен жалғасты. «Қара жорға» биін нәшіне келтіріп орындаған топ өнеріне көпшілік қол соғып, қошемет көрсетті. Концерт студент Фех Эманиулдың орындауында «Атамекен» әнімен аяқталды.