Шымкентте өткен тежегіш ережесіне қатысты айлық барысында 176 кемшілік анықталды
Шымкент қаласы бойынша меншікті тілшісі
Шымкент жүк тасымалы бөлімшесінде «Тежегіш табандықтарын ерекше бақылау» айлығы өтті. 11 қараша мен 11 желтоқсан аралығында өткен айлық аясында бірқатар профилактикалық жұмыстар жүргізілді, деп хабарлайды Rail-news.kz. Айталық, барлық станцияларда вагондарды тіркеуде тежегіш табандықты қоюдың регламенті мен алып тастау уақытын бақылау, башмактардың бүтіндігін, оларды дұрыс есепке қоюды қамтамасыз етуге көңіл бөлінді. Айлық аясында Бурундай станциясында тежегіш башмакты дер кезінде алмағаны үшін вагонның жолдан шығып кету оқиғасының себеп-салдары талданып, онымен 851 теміржолшы таныстырылды. Бір аптадағы тексерісте Арыс, Қалаш, Игілік станцияларында жүргізілген тексеру 7 бұзушылықты анықтады. Ал екінші аптада Сарыағаш, Монтайтас, Шанақ станциялары тексеруден өтіп, тағы бірнеше бұзушылық анықталды. Ал үшінші аптада бөлімше басшысының орынбасары А.Салықбаев Шымкент станциясында түнгі уақытта тексерулер өткізіп, мұнда да бірталай кемшілік анықталды. Сайрам, Текесу, Бадам станциялары да тексерістен тыс қалмады. Ал айлықтың төртінші аптасында бөлімшенің бас инженері И.Нұржанов Шымкент, Меңлібай, Мақтаарал, Жетісай, Жылға, Тоғыс, Дарбаза, Сайрам, Ленгір, Қорғасын станцияларына тексеріс жүргізді. Түркістан өңірі бойынша бөлімше бастығының орынбасары Ғ.Меңдібаев Күншағыр, Ақдала, Қостүйін, Тимур, Ақшоқат, Түркістан, Шойтөбе, Отрабад станцияларын тексерді. Қысқасы, айлық аясында 350 жедел тексеріс жүргізіліп, 176 бұзушылық анықталды. 99 жұмысшы тәртіптік жауапкершілікке тартылды. Локомотив шаруашылығы бойынша 46 тексеріс жүргізіліп, 46 бұзушылық анықталды. Он жұмысшы тәртіптік жауапқа тартылды. Айлық барысында Шымкент ЖТ басшылығы бөгде адамдардың станция парктерінен, сақтау орындарынан тежегіш табандарын ұрлау деректерін болдырмау үшін бірқатар іс-шаралар қабылдады. Станциялық жолдарда вагондарды бекіту бойынша операциялары орындау реттілігі мен жергілікті жағдайларға сәйкестігі, қажет болған жағдайда станция ережесіне сәйкес өзгерістер енгізілу қарастырылды. Құлыптар мен сөрелер жаңартылды. Жұмысшыларға вагон доңғалақтарының астына тежегіш табандықтарын жүйелі тәртіппен орнатуды міндеттейтін нұсқаулықтар өткізілді.