Жамбыл темір жолында пойыздар кестеге сай кедергісіз жүріп жатыр
Барыс жылы енісімен басталған бүлік еліміздің басым бөлігін шарпыды. Әлі де қауіпті аймақтар бар. Сондықтан 19 қаңтарға дейін елде төтенше жағдай режимі енгізіліп, коменданттық сағат бекітілген.
Жамбыл жүк тасымалы бөлімшесі директорының міндетін уақытша атқарушы Дүйсенбек Сыдықов ең алдымен төтенше жағдай күндері пойыздардың қозғалысын шектемеуге күш салынғанын айтты. Жүк және жолаушылар пойыздарының біршама кешігулері орын алған, ол батыстағы келеңсіз оқиғаларға байланысты болғаны белгілі. Дегенмен, келеңсіздіктер теміржолшылардың өз міндетін атқаруына кедергі келтірмеді. Нұр-Сұлтан, Алматы қалаларынан батыс аймаққа баратын пойыздар сол жақтағы жағдайдың ушығып тұруына орай шыққан жоқ. Батыстан да бері қарай қозғалыс болмағаны мәлім. Ал жамбылдық теміржолшылар Қызылордадан кері қайтқан пойыздардың алпыс шақты жолаушысын Шу вокзалынан түсіріп, оларға ыстық тамақ ұйымдастырды. Біразын Алматы, Қарағанды станцияларына баратын басқа пойыздарға отырғызып жіберсе, жақын аралықтағы елге көлік жеткізіп беруге көмектесті.
Аймақ теміржолшылары Тараз әскерилендірілген теміржол күзеті қызметімен бірлесіп, күшейтілген режимде жұмыс істеген. Олар вокзалдар мен теміржолдардың қауіпсіздігіне баса мән берген. Әсіресе, Тараз, Шу станциялары мен Күркіреусу станциясының түбіндегі көпірдің қауіпсіздігіне алаңдағандарын айтады.
Қазір ахуал тұрақталды. Пойыздар қозғалысында кешеуілдеу жоқ, барлығы кестеге сай жұмыс істеуде.
Асхат РАЙҚҰЛ