Өткен жылы Арыста 11 мәрте мал басу оқиғасы тіркелді
Шымкент қаласы бойынша меншікті тілшісі
Арыс жол дистанциясы өткен жылы қауіпсіздік шараларының алдын алып, апат пен оқыс оқиғаларды болдырмауға барын салды. Десе де, пойыздың жолына шығып кеткен қараусыз малға тыйым болмай тұр. Былтыр 11 мал басу оқиғасы орын алды.
Дарбаза-Сарыағаш өткелінде №86 жолаушы пойызы жылқыны қағып кеткен. Электровозға қатты зақым келгені соншалық, көмекші локомотив алдыруға мәжбүр болған. Бір ғана қараусыз малдың кесірінен аталған пойыз Сарыағаш станциясына үш жарым сағат кешігіп келген.
Өкінішке орай, пойыз басып кеткен малдың иесі де табылмайды екен, әлгі 11 малдың тек бесеуінің ғана егесі анықталып, айыппұл салынған. Сонда дейміз-ау, ақ адал малынан бір айрылып, айыппұл тағы төлеп шығынға батқан шаруа «шығасыға иесі басшы» екенін неге ескермейді деген ой келеді. Жолшылар әдетте теміржолға жақын тұратын тұрғындар мен мектеп оқушыларын жиі аралап, қауіпсіздік шараларын түсіндіріп, желілік полициямен тұрақты рейд те өткізіп, мұндай келеңсіз жағдайлардың алдын алуға тырысады.
Айтуынша, 2021 жылы мал жаю ережелерін бұзушыларға қатысты әкімдікке сегіз хат жолданған. Сонымен қатар, автокөлік жүргізушілері темір жол өткелі арқылы өтуде де жиі ереже бұзатыны жасырын емес, сондықтан олардың бәрін бейнебақылаумен жабдықтау қажет.