Ақмола жүк тасымалы бөлімшесі биылғы қаңтарды қорытындылады
«Қазақстан теміржолшысы» газетінің тілшісі
Ақмола жүк тасымалы бөлімшесінің ұжымы биылғы жылдың қаңтар айын жақсы нәтижемен аяқтады. Негізгі пайдалану көрсеткіштері толық орындалып, өткен жылдың есепті мерзімімен салыстырғанда, әсіресе, жүк айналымы сияқты қор құраушы көрсеткіш көтеріңкі.
Яғни, жүк айналымы жоспарының орындалуы 104,3% деңгейінде. Сондай-ақ локомотив паркін пайдалану көрсеткіштері де жаман емес. Локомотивтің ортатәуліктік өнімділігі 106,3% құраса, орта тәуліктегі жүрісі де осы шама шегінде. Сондай-ақ, жүк пойызының техникалық және телімдік қозғалыс жылдамдығы, орташа салмағы меже үдесінен асыра орындалған.
Бөлімшенің және диспетчерлік аппараттың желілік кәсіпорындары ұжымдарының жұмысы сауатты ұйымдастырылуы арқасында барлық шаруалар тыңғылықты атқарылуда. Күн сайын пайдалану жұмысына талдау жүргізіліп, әсіресе, қар тазартатын техникаларға локомотивтің бөлініп отыруы бақылауға алынған.
«Пойыздардың тартымына кететін отын-энергетикалық ресурстарды үнемдеу және өлшегішке нақты норманы төмендету маңызды мәселе болып табылады. 2021 жылдың қорытындысы бойынша 2 тонна дизель отынының үнеміне қол жеткіздік. Жақында Zoom платформасында тораптық планерлік жиын өтті. Онда өткен жылдың жұмысы қорытындыланып, ағымдағы жылға жаңа міндеттер қойылды. Жиында қаралған басты мәселенің бірі Ұлттық компанияның кірісін арттыру болды. Осыған орай, Ақмола жүк тасымалы бөлімшесінде жаңа іс-шаралар әзірленді. Тағы бір маңызды мәселе – ол локомотивтер мен локомотив бригадаларын ұтымды пайдалану. Сонымен бірге, машинистердің ескертулері бойынша берілген жауаптардың сапасына назар аударылды, бұл өз кезегінде пайдалану жұмысындағы жетістіктерге оң әсер етері анық», – деп ақпар берді Ақмола ЖТ бөлімшесінің локомотив шаруашылығы бойынша бөлім бастығы Мұхтар Балғоженов.