Былтыр Шымкент станциясында нормаға сәйкес келмейтін 697 факт анықталған
Шымкент қаласы бойынша меншікті тілшісі
Еліміздің үшінші мегаполисі Шымкентте халық саны уақыт өткен сайын көбейіп, ол қаланың бас қақпасы теміржол станциясының жүктемесін арттырып отырғаны заңдылық. Теміржол саласының қарқынды дамып, мегаполиске сай болуы да уақыт талабы.
Өткен жылы станция пайдалану көрсеткіштерін табысты аяқтады. Айталық, станциядан 45 вагонға 3070 тонна жүк тиеліп, 2020 жылы 47 вагон 3196 тоннадан кеміген. Мамандар оның себебін, жүк жөнелтушілердің сұранысы азайғандығынан деп түсіндірді. Сондықтан мұның өзі жақсы көр- сеткіш саналады. Жүк түсіру көрсеткіші керісінше өскен, өткен жылы 80 вагон, 2020 жылы 71 вагоннан жүк түсірілген. Жалпы, станциядан 54 пойыз қабылданып, 52 пойыз жөнелтіледі. Аса қауіпті аймақ болғандықтан мұнда комиссиялық айлық тексеру- лер жиі жүргізіледі. Өткен жылғы тексерулер нормаға сәйкес емес 697 ауытқуды анықтады, негізгі үлесі жол шаруашылығына тиесілі. Нәтижесінде жол шаруашылығы бойынша шектеу шаралары қолданылып, шпалдардың жарамсыздығынан төрт жол және бес бағыттамалық бұрмасы жабылды.
Пойыздар қозғалысы қауіпсіздігі айтарлықтай қамтамасыз етілді, өткен жылы пойыздық және маневрлік жұмыста бір ғана ақау орын алды. Түлкібас-Арыс учаскесіндегі Ынтымақ-Манкент өткелінде №3403 пойыз машинисі №60437126 вагоннан ұшып шыққан бөгде затты көріп қалып, шұғыл тежеу қолданған. Бұл қозғалыс қауіпсіздігін бұзу оқиғасы ретінде тіркелді. Сондай-ақ, Шымкент станциясынан Қорғасын станциясына бет алған пойызды жөнелту кезінде артқы вагондар істен шыққан. Оның себебі вагонның автотіркегіш құрылғысынан ауытқу табылды. Өткен жылы «Кедентранссервис» АҚ қызметкерлерінің кінәсінен вагондардан тежегіш табандықтарын алып қою салдарынан кірме жолдан 21 вагон жылжып кетіп, Шымкент станциясының 38-ші сақтандыру жолына 14 вагон шығып кеткені де келеңсіз оқиға болды. «Кедентранссервис» АҚ айыпты деп танылды.