Арыстағы вагон қараушылар 4 айда 6 ақау тапқан
Шымкент қаласы бойынша меншікті тілшісі
Қауіп-қатері мол теміржол саласында ақауды дер кезінде анықтап, апаттың алдын алу ерлікпен пара-пар саналады. Жүк пойызы межелі жерге аман-есен жеткенше жол-жөнекей жылжымалы құрамның жай-күйін бақылауда ұстайтын вагон қараушылар еңбегі, расымен, ерен.
Өткен жылдың 1 қарашасынан 1 наурызға дейін жалғасқан «Бүйірлік раманы бақылау» айлығы аясында Арыс вагон пайдалану депосының алты бірдей вагон қараушысы ақау тауып, талай апаттың алдын алды. Соның бірі Бақтияр Мамарасудов өз кәсібіне адалдығымен танылып, жыл соңында марапатқа ие болды. Ол кезекті бір ауысымда жүк құрамының бидай тиелген вагонынан бүйір рамасы жарықшағын тапқан. Тексере келе ұзындығы 31 мм жарықшақ қозғалысқа үлкен қауіп төндіретіні анықталды. Кім біледі, вагон қараушы дер кезінде анықтамаса, Жамбылдағы жағдайдың тағы да қайталанбасына ешкім кепілдік бере алмас еді...
Осы салада 25 жылдан бері еңбек етіп келе жатқан Бақтияр Мамарасудовтың әкесі Пулат кезінде мықты теміржолшы болған екен. Сондай әкенің тәлім-тәрбиесін алған Бақтияр үшін теміржолда қауіпсіздіктен асқан қаиетті ұғым жоқ. Сонымен қатар, ол ақау табу қиын емес, тек қырағылық пен жіті бақылау қажет деп санайды. «Ақау табу – ерлік емес, ол менің күнделікті атқаратын жұмысым мен міндетім» дейді.
Айта кетейік, айлық аясында Арыс вагон пайдалану депосы 5140 вагонды жөндеп шыққан.