Шымкенттік теміржолшылар «Үздік маман» байқауында бақ сынады

Шымкент жүк тасымалы бөлімшесінде «Үздік маман» байқауы өткізілді. Оған аймақтағы он станцияның орта буын мамандары қатысты.

Жалпы, жыл сайын бөлімшеде теміржолшылардың біліктілігі мен кәсіби қабілетін шыңдап, мықтыларды анықтайтын «Үздік маман» байқауын өткізу дәстүрге айналған. Оған қатысатын қызметкерлерден ең бірінші кезекте талап етілетіні аяқ астынан туындайтын төтенше жағдай кезіндегі олардың іс-қимылы және теміржолшылардың өз жұмысын сауатты әдіспен іске асыратынын анықтау болмақ.

Еске сала кетсек, мұның алдында өңірлердің бәрінде «Тежегіш башмакқа – ерекше бақылау» және «Үздік вагон құрастырушы» айлықтары өткен болатын. Соның нәтижесінде Шымкент бөлімшесіндегі конкурсқа станция кезекшілері, вагон құрастырушылар, сигнал берушілер, вагондар қозғалысының жылдамдығын реттеушілер қатысып, өзара бақ сынасты.

Шымкент жүк тасымалы бөлім- шесінің бас инженері Ильяс Нұржанов «Үздік маман» байқауының шарттарымен теміржолшыларды алдын ала таныстырып өткен. Бірінші кезеңде қатысушылар іріктелген.

Байқаудың екінші кезеңінде қатысушылар қозғалыс қауіпсіздігіне қатысты 20 сұраққа жауап берді. Қорытындысы бойынша келесі кезеңге 14 маман өтті. Нақтырақ айтқанда, 5 станция кезекшісі мен 4 пойыз құрастырушысы, 3 вагон қозғалысы жылдамдығын реттеуші, 2 сигнал беруші жоғарыдағы сұрақтарға дұрыс жауап беріп, сыннан сүрінбей өткендер болды. Үшінші тур «Фото бойынша жауабын тап» кезеңінде де қатысушылар үздік атануға барын салды. Дегенмен, сайыстың аты – сайыс, біреу озады, біреу қалады. Қазылар алқасының бағасы бойынша станция кезекшілері арасында барлық сұрақтарға сауатты, дәл жауап беріп, сын тегеурінді жағдайларға төтеп беретін білімі мен біліктілігін танытқан Арыс станциясының кезекшісі А.Еркебаев 1-орынға ие болды. 2-орынды Түлкібас станциясының кезекшісі Н.Отарбаев, 3-орынды Қазығұрт станциясынан М.Козенко жеңіп алды.

Ал пойыз құрастырушылар арасында 1-орын Арыс станциясынан Б.Ермекбайға, 2-орын Қазығұрт станциясының пойыз құрастырушысы А.Тағабаевқа, 3-орын Сарыағаш станциясының пойыз құрастырушысы А.Отыншиевқа бұйырды. Вагондар қозғалысын реттеушілер арасында 1-орынды Арыс станциясынан Н.Тұрымбетов, 2-орынды Шымкент станциясынан М.Абдулгафаров, 3-орынды Түркістан станциясынан Е.Нұрматов иеленді. Станцияның сигнал берушілері арасында 1-орынды Сарыағаш станциясының сигнал берушісі Б.Қанаев, 2-орынды Арыс станциясынан Н.Олжахан алды.

Үздік атанған барлық жеңімпаздарға бағалы сыйлықтар беріліп, бөлімше басшылығы кәсіби мамандарға адал жұмысы үшін алғыс айтты.