Шымкент электрмен жабдықтау дистанциясы өткен жылы оқыс оқиғаларға жол бермеді
Шымкент қаласы бойынша меншікті тілшісі
Шымкент электрмен жабдықтау дистанциясы өткен жылды төтенше жағдай, өндірістік жарақатсыз аяқтады. Дегенмен, пойыздардың кестеден кешігуіне себеп болған бірқатар ақаулар тіркеліп, оның бәрі дистанциялықтар күшімен жедел қалпына келтірілген, деп хабарлайды Rail-news.kz.
Манкент станциясының екінші жолында №2536 пойыздың ток қабылдағышы істен шығып, оқыс оқиға ауа бағыттамасында түйіспелі сымның ілініп қалуынан орын алған. Салдарынан пойыз бір сағатқа кешігіп келді.
Электрмен жабдықтау дистанциясына қарасты байланыс желісінің құрылғылары бойынша 6 жағдай тіркелді. Мәселен, Дарбаза-Жылға өткелінің жұп жолында байланыс желісінің тірек жолы үзіліп, ток қабылдағыштың зақымдануынан №2560 жүк пойызы тоқтап қалған. Орын алған ақауды жою үшін Жылға станциясының электромеханигі Сазановтың басшылығымен құрамында 5 адамы бар бригада оқиға орнына барып, үзілген сымды жалғап, қозғалысты қалпына келтірді.
Ал №86 «Нұр-Сұлтан-Сарыағаш» пойызының артқы ток қабылдағышы сынғаны анықталып, Монтайтас-Шанақ өткелінің жұп жолында электр қуаты өшірілген. Дистанция электромонтері Досымбеков пойыздың ақауын жөндеп, қалпына келтірген соң қуат көзі қосылды.