Шымкент бөлімшесінде жыл басынан 5 мәрте қауіпсіздік ережесі бұзылған

Шымкент бөлімшесінде пойыздар қозғалысының қауіпсіздігі бойынша жыл басынан бері бес бұзушылыққа жол берілген. Өткен жылы дәл осы уақытта екі жағдай орын алған екен.

Алғашқы үш айдың қорытындысы бойынша теміржолдың бағалау көрсеткіші 95 балды құраған. Қанағатта-нарлықсыз жолдар 66 шақырымға жеткен.

Шымкент магистральдық желі бөлімшесінің мамандары ПЧ-53 жолшыларының жұмысынан біраз кемшіліктер анықтап, ескертулер жасады. Айталық, Шымкент станциясы бойынша он күн ішінде теміржол вокзалының жолаушылар платформалары арасындағы жаяу жүргіншілер төсемінің ақауларын жою міндеттелді. Бұдан бөлек, жол дистанциясында санитарлық-профилактикалық жұмыстар жүргізілмейтіні, жұмысшылар жарақат алған жағдайлар бойынша телеграфтық нұсқаулар талданбайтыны белгілі болды және техникалық сабақтар сапасыз өткізілетіні анықталды. Арыс және Шымкент жол дистанцияларының еңбек қорғау бойынша тексерулерді де сапасыз жүргізілетіні сыналды.

Тағы бір жайт, Шымкент станциясының мазутталған жолдары тазартылмаған. Жауаптыларға белгілі уақыт берілді. Осы аралықта ПЧ-53 учаскесінде бір адамды қағып кету оқиғасы тіркелген. Жалпы НЖС-9 бойынша 17 құрылғы істен шықса, тек жол шаруашылығы бойынша тоғыз құрылғы, бес бағыттама бұрмасы істен шыққан.

Дистанция басшыларына ай сайын вагондардың тұрып қалуы, теміржол тарифі мен локомотив тартымы бойынша шығындарды есептеудің дұрыстығына талдау жасау жүктелді. Ал жолшылар жоғарыда айтылған кемшіліктерді жойып, жұмыс сапасын арттыруға міндеттелді.