Қызылордалық вагон қараушы қырағылығымен жұртты тәнті етіп жүр
Қызылорда облысы бойынша меншікті тілші
Пойыздардың қозғалыс қауіпсіздігін қамтамасыз етуде өзгелерге сөзімен емес, ісімен үлгі бола білген қызылордалық вагон қараушы, екі мәрте «Қозғалыс қауіпсіздігі үшін» төсбелгісінің иегері Сейтмек Онбаев, әріптестерінің айтуынша, өзінің шеберлік мектебін қалыптастыруға лайық жан.
Бәкене бойлы, өз ісінің хас шебері атанған жігіт – кәсібіне берілген нағыз маман. Сан мәрте қауіптің алдын ала білген Сейтмек – кәсібіне адалдық адамды құрметке бөлейтінін дәлелдей білген теміржолшы. Оның назарынан ақаулы вагон мүлт кетпейді екен деп аңыз айтатындар да бар. Қалай болған күнде де екі рет «Қозғалыс қауіпсіздігі үшін» төсбелгісімен тегін адам марапатталмаса керек.
Өткен айда тағы бір вагоннан күрделі ақау анықтап, тағы бір қауіптің алдын алыпты. Наурыз айының 27-і күні №3523 жүк пойызына техникалық қызмет жасап жүріп, доңғалақ жұптарынан шыққан әлсіз ғана оғаш дыбысқа кәсіби дағдысымен елең етіп, қайта үңілген. Тексере келе №56749195 нөмірлі вагон доңғалағынан табылған ақау қозғалыс қауіпсіздігіне қауіп төндіріп тұрғаны анықталды.
Қазалы вагон пайдалану депосының Қызылорда станциясындағы техникалық қызмет көрсету пунктінде бірнеше жылдан бері Сейтмекпен бірге жұмыс жасап келе жатқан әріптестері де оның бойынан нағыз кәсіби теміржолшыға, вагон қараушыға тән қасиеттің бәрі бар екенін мойындайды, әсіресе қиядағыны көзі шалатын ерекше қырағылығына тәнті болады.
– Пойыздардың қозғалыс қауіпсіздігін сақтауды арттыру – теміржолшының ең басты міндеті. Осыған байланысты депо бойынша өтетін қауіпсіздік акцияларына ұжымның барлық мүшелері тегіс атсалысады. Акция кезінде ақаулы вагондарды тауып, еңбегі еленген ұжымдастарымыз құрметке бөленіп, марапатқа, сыйақыға ұсынылады. Солардың арасында Сейтмек Онбаевтың орны ерекше. Вагонда, әсіресе, бүйір рамасының ақауын табу өте қиын жұмыс, оны жай көзбен көріп анықтау мүмкін емес, тек тәжірибелі вагон қараушылар дыбыстан аңғаратын көрінеді. Тіпті, кейде осындай күрделі ақаулар түнгі мезгілде табылып жатады, бұл нағыз ерлік саналады. Сейтмек – осындай аңғарылуы қиын ақауды жеті қараңғы түнде, қол шамы мен балғасының көмегімен, бүйір рамасының ішкі жағының ақауын айнаның көмегімен анықтаған теміржолшы, қырағылық – оның кәсіби дағдысы, – деп пікір білдірді әріптесінің кәсібилігіне ерекше сүйсінген Қызылорда ТҚКП басшысы Рүстем Ұзақбаев.
– Депоға вагон қараушы болып жұмысқа орналасқан 2002 жылдан бері, шүкір, абыройсыз емеспін. Әрине, адам іштен бәрін біліп тумайды, мен де алдымдағы ұстаздарымнан оқыдым-тоқыдым, үйрендім. Жүре келе тәжірибе жинап, адамда дағды, кәсіби білік, түйсік пайда болады, кейде тіпті келіп тоқтаған құрамнан ақау шығарын күні бұрын сезіп тұратын боласың, – дейді үздік вагон қараушы Сейтмек Онбаев.