Қызылорда бөлімшесінде жұмысшыларды сақтандыруға арнайы қаржы қарастырылған

Қызылорда бөлімшесінде еңбек қорғаудың жүйесі қалыптасқан. Теміржолшыларды өндірістік жұмыс барысында жазатайым жарақат алудан сақтандыруға арнайы қаражат бөлініп, ол мақсатты түрде игеріліп келеді. 

Бөлімше бойынша еңбек қорғау және экология бөлімі мамандарының тарапынан жұмыс орындары алдын ала тексеріліп, бақылаудан өткізіледі. Және жұмыс орнының жұмыс істеуге қолайлылығы, талапқа сай келетін- келмейтіні арнайы мамандар тарапынан бекітілген жоспар негізінде аттестациядан өткізіліп, барлық стандартқа сай келетін орында ғана теміржолшының жұмыс жасауына рұқсат беріледі. Биыл бөлімше бойынша еңбек қауіпсіздігі шарттарын жетілдіру мақсатына 10 кешенді шара жоспарланып, оған 70 760,765 мың теңге қаржы бекітілген. Жыл басынан бері екі шара өткізіліп, оған бөлінген 1162,65 мың теңге мақсатты жұмсалды.

-Біздің бөлімше бойынша өндірістік жарақат алу жағдайы биылғы жылдың үш ай жиырма күнінде, яғни бүгінгі күнге дейін тіркелген емес. Келеңсіз жағдайдың алдын алу үшін бекітілген жоспар бойынша кунделікті  жұмыс жүргізіп, осылай әр күнді есепке алып отырамыз.  Өткен жылы теміржолшылардың қауіпсіздігін арттыруға арналған  семинар тренингтер өткізіп, біліктілік сауатын көтеруге жұмыс жасадық. Өндірістік жарақат алған  әріптестерімізге тиісті төлемдер дер кезінде аударылып отыр ма, басқа да көмектерді алып отыр ма, бәрін қадағалап отырамыз,-деді еңбек қорғау және экологиялық қауіпсіздік бөлімінің бастығы Ғалия Қөпжасарова.

Өндірістік жұмыс барысында 1981 жылы келеңсіз жағдайға ұшырап есепке алынған локомотив бригадалары резервінің басшысы Болат Қалмахановқа биылғы үш айда алты жүз мыңнан астам қаражат төленген.  Мұнан бөлек бөлімше есебінде тіркелген өзге де регрессивтерге төлемдер уақытылы төленіп, қауіпсіздік пен қорғау шаралары тұрақты жүргізілуде.