Атыраудағы темір жол басшылары тыл ардагерін құттықтады

Ұлы Отан соғыс кезінде тылдағы халық соғыстың алғашқы күнінен бастап “Барлығы майдан үшін, барлығы жеңіс үшін!” деген ұранмен еңбек етті. Қан майданға аттанған ерлердің орнын әйелдер, қариялар мен балалар алмастырды.

Атыраулық тыл еңбеккері Мұхтаров Мақсот алты жасынан бастап еңбекке араласыпты. Бүгінде 86 жасқа келген ардагер баянсыз балалық шағын көзіне жас алмай еске ала алмайды. Кеше тыл ардагерін Атырау жүк тасымалы бөлімшесінің басшысы Аслан Базарғалиев пен кәсіподақ ұйымының төрағасы Нұрбол Нұрышев Жеңістің 77 жылдығымен арнайы құттықтады. 

6 мамыр Мақсот ағаның туған күні екен әрі Жеңістің 77 жылдығына орай әріптес інілерінің арнайы құттықтап келгеніне қария балаша қуанып қарсы алды. Бөлімше бастығы «ҚТЖ-Жүк тасыма лы» ЖШС Бас директорының Алғыс хаты, сондай-ақ өз аттарынан дайындаған сый-сияпаттары мен ақшалай көмек және әлеуметтік қоржын табыс етті. Ал, қазақы дәстүрмен жайылған кең дастархан басында темір жолдың өткені мен бүгіні туралы келелі әңгіме қозғалып, болашақтағы әлеуеті туралы пікірлер айтылды. 

– Өркендерің өссін, көптен көп рахмет айтамын. Сіздер келеді деп естігеннен бері көңілім алып-ұшып, көңілденіп асыға күттім. Қазір тіптен қуанып отырмын. Аман жүріңдер, жұмыстарың жемісті болсын, біз тек тілектеспіз, – деп қарт теміржолшы батасын берді. 

Мұхтар аға алты жасынан еңбекке қалай араласты десек, анасына көмектесіп колхозда қозы бағыпты. «Е, қарақтарым, ол кезде сен алтыдасын ба, жоқ алпыстасың ба, айырмашылық жоқ, еңбектеген баладан еңкейген кәріге дейін жауды жеңсек деген тілекпен жанталастық емес пе...» деп ауыр күрсінді біздің таңданысымызды түсініп. Ер жете келе Атырау станциясына келіп пойыз құрастырушы, башмақшы болып жұмыс істеп, зейнеткерлікке шыққан. Бүгінде ұрпақ қызығына кенеліп, Ұлы Жеңістің 77 жылдығын көріп отырған бақытты ата.