Семейде жаз шыға балалар қауіпсіздігі алаңдатады
Абай облысы бойынша меншікті тілші
Желі бойындағы қауіпсіздікті сақтауда ел шығысындағы теміржолшылар үшін тағы бір мазасыз маусым басталды. Балалардың жазғы каникулға шығуымен олардың қауіпсіздігі алаңдатады.
Осыған орай, аймақтағы теміржол көктей өтетін Үшбиік, Аягөз, Шар, Жаңғызтөбе, Суықбұлақ, Қапанбұлақ, Жарма, Семей сынды іргелі станцияларда қауіпсіздік шаралары жылдағы қалыптасқан дағдыға сай күшейтіле түседі. Жергілікті локомотившілердің айтуынша, биылғы ахуал біршама алаңдатып тұр. Мәселен, жыл басынан бері аймақта 29 шұғыл тежеу орын алыпты. Өкінішке орай, оның 9-ында пойыз адам қағып кеткен.
– Сараптама барысы көрсеткендей, балалар жиі ұшырайтын желі бойындағы жазатайым оқиғалардың басым бөлігі жазғы каникул кезінде орын алады екен. Зардап шеккендердің көпшілігі – мектеп оқушылары мен мектеп жасына дейінгі балалар. Теміржол бойындағы оқыс оқиғалардың жиі орын алатын жері – белгіленбеген жерлерден кесіп өту, – дейді ТЧЭ-24 мекемесінің бас инженері Дархан Қажығұлов.
Қазіргі таңда жергілікті локомотившілер қауымы оқыс оқиғалардың алдын алу және қауіп-қатерден сақтандыру мақсатында жоспарлы жұмыстарды бастап кетті. Бұл ретте «ҚТЖ-ЖТ» ЖШС-ның Қозғалыс қауіпсіздігі департаментінен келген арнайы нұсқаулықтар аясында жұмыстар жүргізілуде. Сонымен қатар, осы шаралар аясында түсіндіру, ақпараттандыру, рейдтік тексерулер жүргізу сынды жұмыстар да жанданып жатыр.