Қызылордалық өнертапқыштың қондырғылары кеңінен қолданыста

Қызылорда белгі беру және байланыс дистанциясы өткен жылы салалық жарыстың жеңімпазы атанды. Ұлттық компания бойынша өтетін байқауда бағы жану – кез келген кәсіпорынға бұйыра бермейді. Дистанциялықтар бірауыздан бұл ең алдымен өз орталарындағы өндірісті өрге сүйреген өнертапқыштар еңбегі деседі.

Техникалық өндірістік құжаттар бөлімі – дистанцияның «жүрегі», оның еркін тыныстауын қамтамасыз ететін ерекше бөлім. Мұнда техникалық құжаттарды көз майын тамызып оқитын, инемен құдық қазғандай зерттеп-зерделейтін Нұрлан Жәнібеков бастаған кіл сауатты мамандар жұмыс істейді. Нұрлан Аймахан, Жанна Абдуайтова, Ақмарал Қалиева және Айқын Абылбековалардың қай-қайсысы да осал емес. Олар дистанция телімдерінде орналасқан байланыс құрылғыларының техникалық құжаттарын жергілікті учаскелерге сәй- кестендіріп, қажет жерінде сызбасын сызып, нормативтік құжаттамалар әзірлейді. Мәселен, өткен жылы Шиелі станциясы мен 20-бекет, Керкелмес және Бөріойнақ бекеттерінде станциялық жолдардың ұзартылуына сәй- кес, Жосалы-Қызылорда, Қызылорда-Шиелі және Шиелі-Түркістан учаскелерінің микропроцессорлы автоматтандырылған диспетчерлік орталықтандыру (МП-АСДЦ) жүйесіне көшірілуіне байланысты техникалық құжаттарды талап деңгейінде әзірлеп, нормативтік актілерді дайындаған осы бөлім. Алдағы уақытта АСУШ және АРМ-ВТД жүйесін өндіріске кеңінен қолданудың кешенді жоспарларын игеруді қолға алып отыр. 

Байланыс құрылғыларының техқұжаттарын нормативтік құжаттарға сәйкестендіріп рәсімдеумен қатар жаңа технологияларды технологиялық құжаттарға сәйкес жергілікті учаскелерге бейімдеп өзгерту және де оны құзырлы органдар тарапынан дәлелдеп бекітуі оңай жұмыс емес. Дистанцияның тіршілік көзіне айналып отырған осы бөлімді басқарып отырған Нұрлан Жәнібеков – еңбек жолын жоғары білім алған соң Жалағаш станциясында аға электромеханик болып бастаған маман. Соңғы бес-алты жылдың көлемінде жылына кемінде бес рационализаторлық ұсыныс енгізіп, олардың өндірісте кеңінен қолданылып, тиімді табыс әкелуіне мұрындық болып жүрген өнертапқыш-инженер өз ісінің нағыз шебері. Мысалы, оның өткен жылы қорғаған «Дизельді генератор қондырғысын (ДГА) ЭЦ қондырғыларына қосу» атты рационализаторлық ұсынысы 2011 жылы өндіріске енгізілген микропроцессорлы Рca Power маркалы дизель қондырғыларына қатысты жасалып, қазіргі таңда теміржолда кеңінен қолданылуда. Ал, аймақтағы Анакөл, 16 бекет, Қызылорда және Жалағаш станцияларында Рca Power дизель қондырғылары Нұрланның рационализаторлық ұсынысымен жергілікті учаскелердің ерекшелігіне сәйкестендіріліп, өзгерген нұсқада жұмыс жасап тұр. 

Нұрланның тағы бір рационализаторлық туындысы – «Блок пен релелерді тексеру стендісі» де өндірісте кеңінен қолданыста. Мұндағы ерекшелік техникалық жөндеу учаскелерінде теміржол автоматикасы мен механизмі құрылғыларының жұмыс сапасын тексеруді жетілдіру болып табылады. Құрылғылардың өндірістік жұмыс кезінде жұмыстан тыс қалуын жан-жақты зерттей келе аталған тетіктерді тексеру стендісі жасалған екен. Дистанция өнертапқыштары туындылардың сынақтан өтіп, техқұжаттарының жасалуына бір кісідей атсалысқан.