Семейде станция басшылары оқушыларға қауіпсіздік ережелерін түсіндіріп жатыр

Семей ЖТ бөлімшесі бойынша желі бойындағы шұғыл тежеу оқиғалары, соның ішінде адам басу сынды келеңсіз фактілер жиілеуде. Мұндай жайттар әсіресе, халық көп шоғырланған ірі станцияларда тіркеліп отыр.

Осы орайда бөлімшеге қарасты станциялар басшылары жұртшылық арасында түсіндіру-ақпараттандыру жұмыстарын бастап кетті. Әсіресе, жазғы мектептің оқушыларымен жиындар өткізіп, желі бойындағы төнер қауіптен сақтандыруда. Мәселен, жуырда Шар станциясының бастығы Бейімбет Байсаринов осынау елді мекенге қарасты П.Г.Карелин және Абай атындағы мектептерде жас буынмен жүздесіп, желі бойындағы қауіпсіздік ережелерін түсіндірді. Теміржолшылар мұндай ескертулерді 25 мамыр күнгі соңғы қоңырау салтанаты кезінде де айтқан болатын. Жазғы каникул кезінде де сақтандыру шаралары жүргізіле бермек. Қозғалыс қауіпсіздігі бойынша көрсеткіштер көңіл көншітпейді, себебі, осы жылдың басынан бері аймақта 29 шұғыл тежеу оқиғасы орын алыпты. Өкінішке орай оның 10-ында адам қағып кету жағдайлары орын алды.

– Әсіресе мектеп жасындағы балалар жиі ұшырайтын желі бойындағы жазатайым оқиғалардың басым бөлігі жазғы каникул кезінде орын алады. Темір жол бойындағы оқыс оқиғалардың жиі орын алатын жері белгіленбеген жерлерден кесіп өту, сонымен қатар теміржол өткелдерінде қауіпсіздік шараларын сақтамау, – дейді Шар станциясының бастығы Бейімбет Бейбітұлы. 

Темір жол бойында қауіпсіздікті сақтауға қатысты жұмыстар Жаңғызтөбе, Жарма, Аягөз және Семей мен Жаңа-Семей станцияларында да қолға алынуда. Аймақтағы келеңсіз жайтқа тек балалар ғана емес, ересектер де себепкер болуда. Мәселен, осы аптаның ішінде Риддер станциясында әйел адам теміржолдың бел- гіленбеген жерінен өтіп, тепловоздың астында қалып қаза тапты. Бұл оқиға бойынша желілік полиция қызметкерлері қылмыстық іс қозғап, қазіргі күні тергеу жұмыстары жүргізіліп жатыр. Бұл орайда тәртіп сақшылары соңғы уақыттарда бөлімше бойынша суицидтік әрекеттердің де жиілегенін айтуда.